Read Свето Писмо: Стандардна Библија 2006 (со девтероканонски книги) Псалми 92 Bible Online

Псалми 92 - Свето Писмо: Стандардна Библија 2006 (со девтероканонски книги) bible

Псалми 92

¹Добро е да се слави Господ и да Му се пее на името Твое, Севишен,

²да се возвестува наутро милоста Твоја, и секоја ноќ — Твојата верност,

³на десетострунена харфа и на лира.

⁴Зашто Ти ме развесели, Господи, со Твоите дела, на делата на Твоите раце им се радувам.

⁵Колку се големи делата Твои, Господи! Многу се длабоки Твоите помисли!

⁶Безумниот човек не ќе може да ги узнае, неразумниот нема да го разбере ова:

⁷дури грешниците и да никнуваат како трева, и кренат глава оние што вршат беззаконие, тоа е за да бидат истребени засекогаш,

⁸Ти си, Господи, Севишен секогаш!

⁹Зашто, еве, непријателите Твои, Господи, ќе пропаднат и ќе се растураат сите што вршат беззаконие;

¹⁰а мојот рог Ти го вознесуваш како рог на еднорогот, и ме помазуваш со чисто масло.

¹¹Моите очи го видоа падот на непријателите мои, и ушите мои го слушнаа тресокот на побунетите против мене злосторници.

¹²Праведниот цути како палма, се издига како кедар леванонски.

¹³Тие се засадени во домот Господов, ќе цутат во дворовите на нашиот Бог;

¹⁴тие и во староста ќе бидат плодни, сочни и полни со свежина,

¹⁵за да возвестуваат дека е праведен Господ, мојата Карпа во Која нема неправедност.