Read Свето Писмо: Стандардна Библија 2006 (со девтероканонски книги) Псалми 94 Bible Online

Псалми 94 - Свето Писмо: Стандардна Библија 2006 (со девтероканонски книги) bible

Псалми 94

¹Боже, Господи на одмаздата, Боже на одмаздата, покажи се!

²Стани, Судијо на Земјава, дај им отплата на горделивите!

³До кога нечестивите, Господи, до кога нечестивите ќе се фалат,

⁴ќе мрморат и говорат дрско, до кога ќе зборуваат така сите злосторници?

⁵Го газат Твојот народ, Господи, и го угнетуваат Твоето наследство;

⁶вдовица и туѓинец убиваат, и сирак усмртуваат.

⁷Па велат: Господ нема да види, Бог Јаковов нема да дознае!

⁸Вразумете се, вие што сте безумни! И дали вие, луѓе, некогаш ќе се опаметите?

⁹Оној, Кој го насадил увото, нема ли да чуе, и Оној што го поставил окото, нема ли да види?

¹⁰Оној, Кој ги вразумува народите, и Кој го учи човекот на знаење, зар нема да казни?

¹¹Господ ги знае човечките мисли, знае дека се тие суетни.

¹²Блажен е оној човек, кого го вразумуваш Ти, Господи, и го поучуваш на Твојот закон,

¹³за да му дадеш мир во лошите денови, додека за грешникот не се ископа гроб!

¹⁴Зашто Господ нема да го отфрли Својот народ и нема да го остави Своето наследство,

¹⁵зашто правдата не ќе се врати кај праведните и сите прави по срце ќе ја следат.

¹⁶Кој ќе се крене за мене против лукавите или кој ќе стои покрај мене против злосторниците?

¹⁷Да не ми беше помогнал Господ, душата моја брзо ќе се преселеше во светот на мртвите!

¹⁸Кога помислив: ногата ми се поколеба, — Твојата милост Господи, ми помогна!

¹⁹Кога се намножуваа тешкотиите во срцето мое, Твоите утехи ја развеселуваа душата моја.

²⁰Па зар до Тебе ќе се приближи престолот безбожнички, оној што работи спротивно на законот Твој?

²¹Ја ловат душата на праведниот и осудуват невини на смрт.

²²Но Господ е мое прибежиште и Бог мој — сигурна тврдина моја.

²³Тој ќе им плати за нивното беззаконие, и за нечестивоста нивна ќе ги погуби, Господ Бог ќе ги погуби.