Read Свето Писмо: Стандардна Библија 2006 (со девтероканонски книги) Псалми 96 Bible Online

Псалми 96 - Свето Писмо: Стандардна Библија 2006 (со девтероканонски книги) bible

Псалми 96

¹Запејте Му на Господ песна нова, запеј Му на Господ, цела Земјо!

²Пејте Му на Господ, благословувајте го името Негово, благовестете го од ден на ден спасението од Него;

³разгласувајте ја меѓу народите славата Негова, и на сите народи — чудесата Негови;

⁴зашто велик е Господ и достоен за пофалба, страшен е Тој над сите богови.

⁵Бидејќи сите богови на незнабошците се идоли, а Господ ги создаде небесата.

⁶Слава и величие се пред лицето Негово, сила и великолепие — во светилиштето Негово.

⁷Воздајте Му на Господ, племиња народни, воздајте Му на Господ слава и чест;

⁸воздајте Му на Господ слава на името Негово, принесете жртви и влезете во Неговите дворови;

⁹поклонете Му се на Господ во светите дворови Негови. Да затрепери пред лицето Негово целата Земја!

¹⁰Кажете им на народите: Господ се зацари! Затоа цврста е вселената, нема да се разниша. Тој управува праведно со народите.

¹¹Нека се развесели небото и да се возрадува Земјата, нека се раздвижи морето и она што го исполнува;

¹²нека се радуваат полињата и сѐ што е на нив, да ликуваат сите дрвја по дубравите,

¹³пред лицето на Господ, зашто иде, зашто Тој иде да ѝ суди на Земјата. Тој ќе ѝ суди на вселената по правда, и на народите — според Својата вистина.