Read Свето Писмо: Стандардна Библија 2006 (со девтероканонски книги) Псалми 97 Bible Online

Псалми 97 - Свето Писмо: Стандардна Библија 2006 (со девтероканонски книги) bible

Псалми 97

¹Господ се зацари: нека се радува Земјата; нека се веселат многубројните острови.

²Облак и мрак е околу Него; праведност и правда се основа на Неговиот престол.

³Пред Него оган врви и ги гори непријателите Негови наоколу.

⁴Неговите молњи ја осветлуваат вселената; Земјата гледа и трепери.

⁵Горите се топат како восок од лицето на Господ, од лицето на Господ, по целата Земја.

⁶Небесата ја разгласуваат Неговата праведност, и сите народи ја гледаат Неговата слава.

⁷Нека се засрамат сите, кои се поклонуваат на ликови, кои се фалат со своите идоли. Поклонете Му се сите „богови.“

⁸Чу Сион и се зарадува, се веселат ќерките Јудини заради Твоите пресуди, Господи,

⁹зашто Ти си, Господи, Севишен на целата Земја, повисок си од сите богови.

¹⁰Господ ги сака оние што го мразат злото. Ја чува Господ душата на Своите светии; од раката на нечестивите ќе ги избави.

¹¹Светлина засветли над праведниот, а за правите по срце — радост.

¹²Радувајте се, праведни, во Господ и славете го Неговото свето име.