Read Свето Писмо: Стандардна Библија 2006 (со девтероканонски книги) Изреки 14 Bible Online

Изреки 14 - Свето Писмо: Стандардна Библија 2006 (со девтероканонски книги) bible

Изреки 14

¹Мудрата жена си ја гради куќата, а глупавата ја урива со своите раце.

²Кој оди по прав пат, се плаши од Господ; на кого патиштата му се криви, тој Го презира (Господа).

³Во устата на безбожникот е камшикот на гордоста; а мудрите ги чува нивната уста.

⁴Каде што нема волови, амбарите се празни; а од силата на воловите има изобилно жито.

⁵Верен сведок не лаже, а лажливиот сведок шири многу лаги.

⁶Развратникот бара мудрост, и не ја наоѓа; а разумниот до знаењето лесно доаѓа.

⁷Бегај од безумен човек, кај него нема да најдеш разумна уста.

⁸Мудар човек внимава на своето однесување, неразумноста на глупавите ги води во заблуда.

⁹За глупавите гревот е шега, а со праведните е милоста Божја.

¹⁰Секој сам ги доживува своите таги и своите радости и никој друг не може со него да ги сподели.

¹¹Куќата на беззакониците ќе се сотре, а живеалиштето на праведните ќе преуспее.

¹²Има патишта, кои на човек му изгледаат прави, но крајот нивни води во смрт.

¹³И при смеа понекогаш срцето боли, а по радоста настапува тага.

¹⁴Човек со развратно срце ќе ги добие плодовите на своето однесување, а добриот — ќе живее во задоволство.

¹⁵Неразумниот верува на секој збор, а благоразумниот е внимателен на своите чекори.

¹⁶Мудриот има страв и бега од злото, а неразумниот не се чува, бидејќи се чувствува безбеден.

¹⁷Избувливиот човек прави глупости, а пакосниот е омразен.

¹⁸Безумните глупост добиваат за награда, а благоразумните се украсуваат со знаење.

¹⁹Лошите ќе се поклонат пред добрите, а безбожните — пред вратите на праведникот.

²⁰Сиромавиот го мразат дури и неговите блиски, а богатиот има многу пријатели.

²¹Греши оној што го презира својот ближен, а блажен е оној што е милосрден кон сиромасите.

²²Нели се заблудуваат оние, што кројат зло? Но милост и верност има кај оние што мислат добро.

²³Од секој труд има добивка, а празните зборови водат кон скудност.

²⁴Венец на мудрите е богатството нивно, а животот на безумните е глупост.

²⁵Верен сведок души спасува, а лажливиот лаги измислува.

²⁶Во стравот пред Господ има голема надеж, и на чедата Свои Тој им е прибежиште.

²⁷Стравот Господов е извор на животот, извор што оддалечува од мрежите на смртта.

²⁸Во многуброен народ е величието на царот, а кога нема народ — пропаст е за господарот.

²⁹Кај трпеливиот човек разум има многу, а лутиот полн е со глупости.

³⁰Кроткото срце е живот за телото, а зависта е гнилеж за коските.

³¹Кој притеснува сиромав, го навредува неговиот Создател, а кој Го почитува Создателот, му прави добро на оној што е во нужда.

³²За своето зло безбожниот ќе пропадне, а праведниот и при смртта ќе има надеж.

³³Мудроста почива во срцето на разумниот, а во срцето на безумниот ја нема.

³⁴Правдата народ подига, а беззаконието срамоти народи.

³⁵На царот мил му е разумниот слуга, а се разгневува против оној, кој го посрамува.