Read Свето Писмо: Стандардна Библија 2006 (со девтероканонски книги) Изреки 15 Bible Online

Изреки 15 - Свето Писмо: Стандардна Библија 2006 (со девтероканонски книги) bible

Изреки 15

¹Кроткиот одговор гневот го ублажува, а навредлив збор јарост предизвикува.

²На мудрите јазикот добри знаења искажува, а на безумните устата глупости блуе.

³Очите Господови се на секое место: тие ги гледаат и лошите и добрите.

⁴Кроток јазик е дрво на животот, а злиот — рана на душата.

⁵Безумниот се подбива со татковата поука; а кој слуша прекор, разумен е.

⁶Во куќата на праведникот — големо богатство, а печалбата на нечестивиот — пропаѓа.

⁷Устите на мудрите знаење сеат, но срцето на безумните не постапува така.

⁸Жртвата на безбожните е одвратност пред Господ, а молитвата на праведните Му е пријатна.

⁹Патот на нечестивиот е одвратност пред Господ, а кој ја бара правдата, Тој го сака него.

¹⁰Остра казна го чека оној што го остава правиот пат, а кој го мрази изобличувањето — ќе загине.

¹¹Пеколот и пропаста се откриени пред Господ, а како ли нема да бидат — срцата на синовите човечки?

¹²Развратникот не ги сака оние, што го прекоруваат, тој не разговара со мудрите.

¹³Весело срце го прави лицето весело, а при тажно срце — и лицето е натажено.

¹⁴На разумен срцето бара знаење, а устите на безумните со глупост се хранат.

¹⁵На несреќниот сите дни му се тажни; а животот на среќниот е постојано празнување.

¹⁶Подобро малку, но со страв Господов, отколку големо богатство, и со него немир.

¹⁷Подобро јадење од зеленчук, и со него љубов, отколку угоени телиња, и со нив омраза.

¹⁸Избувлив човек расправии крева, а трпеливиот караници смирува.

¹⁹Патот на мрзливиот е послан со трње, а патот на праведниот е чист.

²⁰Мудриот син го радува татко си, а безумниот нема почит кон мајка си.

²¹На неразумниот безумни му се патеките, а разумен човек оди по правиот пат.

²²Без советување намерите се осуетуваат, а при многу советници тие успеваат.

²³Пријатно е да се знае добро да се одговори. Колку добар е зборот изговорен во вистинскиот момент!

²⁴Мудриот размислува за патот на животот, за да се отстрани од патот што води во пеколот и да се спаси.

²⁵Господ ќе го сотре домот на горделивите, а меѓата на вдовицата ќе ја зајакне.

²⁶Помислите на лошите се одвратни пред Господ, а зборовите на непорочните Му се угодни.

²⁷Лакомиот ќе го растури својот дом, а оној, кој мрази поткуп, ќе живее.

²⁸Срцето на праведниот мисли што зборува, а устата на нечесните исфрла зло.

²⁹Господ е далеку од безбожните, но ја слуша молитвата на праведните.

³⁰Светол поглед срце радува, добра вест коски храни.

³¹Кој го слуша учењето на животот, меѓу мудри ќе живее.

³²Кој ја отфрла поуката, ја мрази душата своја; а кој слуша изобличување, тој придобива разум.

³³Стравот Господов учи на мудрост, а пред славата оди смиреноста.