Read Свето Писмо: Стандардна Библија 2006 (со девтероканонски книги) Изреки 16 Bible Online

Изреки 16 - Свето Писмо: Стандардна Библија 2006 (со девтероканонски книги) bible

Изреки 16

¹Човекот размислува во срцето свое, но одговорот на јазикот е од Господ.

²Сите дела на човекот му изгледаат дека се исправни, но Господ ги испитува душите.

³Предај ги делата свои на Господ, и твоите намери ќе се исполнат.

⁴Господ направил сѐ со определена цел, а и безбожниците — за судниот ден.

⁵Секој горделив по срце е одвратност пред Господ: биди сигурен дека тој нема да остане неказнет.

⁶Со милосрдност и правда грев се исчистува, и со страв Господов зло се отстранува.

⁷Кога на Бога Му се пријатни патиштата на човекот, Тој и со непријателите негови го смирува.

⁸Подобро мала печалба со правда, отколку голема добивка со неправда.

⁹Човекот сам го обмислува патот свој, но Господ управува со него.

¹⁰Во устата на царот има вдахновено слово; неговата уста не смее да греши на суд.

¹¹Точните мерила и тасовите се од Господ; од него се и сите точни мери.

¹²Незаконското дело е одвратно за царевите, зашто со правда престолот се зајакнува.

¹³Справедлива уста на царот му е пријатна, и тој го сака оној, што ја кажува вистината.

¹⁴Царевиот гнев е гласник на смртта; но мудар човек ќе го смилостиви царот.

¹⁵Во светлиот поглед на царот има живот, и неговото благоволение е облак со задоцнет дожд.

¹⁶Да се здобиеш со мудрост е многу подобро, отколку со злато, и да се здобиеш со разум е повеќе за претпочитување отколку одбрано сребро.

¹⁷Патот на праведните е отстранување од злото: кој ги пази своите патишта — душата своја ќе ја запази.

¹⁸Пред погибел гордоста врви, и пред паѓање — надменоста.

¹⁹Подобро е да се смируваш во духот со кротки, отколку да делиш грабеж со горделиви.

²⁰Кој ја води разумно работата своја, добро ќе најде, и кој се надева на Господ, блажен е.

²¹Мудрите по срце, разумни ќе ги наречат, и слаткиот збор го зголемува знаењето.

²²Разумот за оние, што го имаат, е извор на животот, а ученоста на безумниот е глупост.

²³Срцето на мудриот го прави јазикот негов мудар, и го умножува знаењето во устата негова.

²⁴Пријатни зборови се восочен мед: за душата слатки, а за коските лековити.

²⁵Има патишта, кои на човекот му изгледаат прави, но крајот им е пат кон смртта.

²⁶Кој се труди, се труди за себе, зашто кон тоа устата го упатува.

²⁷Лукав човек зло замислува, во устата своја — оган разгорува.

²⁸Подмолен човек сее раздор, и клеветник пријатели разделува.

²⁹Злонамерен човек го мами својот ближен и го води кон лош пат;

³⁰замижува со очите, за да измисли подмолност: прекасувајќи си ги усните, извршува зло.

³¹Староста е венец на славата, таа води по патот на правдата.

³²Долготрпеливиот е подобар од храбриот, и кој владее со себе, подобар е и од освојувач на градови.

³³Ждрепка се фрла во скут, но сѐ што решава таа, од Господ е.