Read Свето Писмо: Стандардна Библија 2006 (со девтероканонски книги) Изреки 18 Bible Online

Изреки 18 - Свето Писмо: Стандардна Библија 2006 (со девтероканонски книги) bible

Изреки 18

¹Тврдоглавиот се управува според своите желби и станува против сѐ што е умно.

²Безумниот не сака знаење, туку само да ги изложи своите мисли.

³Со доаѓањето на нечесниот, доаѓа и презирот, а со недостојниот — доаѓа и срамот.

⁴Зборовите на човечката уста се длабоки води; извор на мудроста — брзотечен поток.

⁵Не е добро да бидеш лицемерен кон безбожниот, за да го собориш праведниот во судот.

⁶Устата на безумниот води кон кавга, а зборовите негови предизвикуваат тепачка.

⁷Јазикот на безумниот е погибел за него, а усните негови се стапица за душата негова.

⁸Зборовите на клеветникот се како слатки, и тие влегуваат внатре во утробата.

⁹Немарниот во работата своја е брат на расипникот.

¹⁰Името на Господ е цврста кула: ако во неа побегне праведник, безбеден е.

¹¹Имотот на богат човек е како тврдина и во мислите му е како висока ограда.

¹²Пред паѓање срцето на човекот се возгордејува, а смиреноста оди пред славата.

¹³Кој дава одговор пред да ислуша, безумен е; тоа е срам за него.

¹⁴Духот на човекот го поткрепува во немоќ, а скршен дух — кој може да поткрепи?

¹⁵Срцето на разумниот се здобива со знаење, и увото на мудрите бара поука.

¹⁶Подарокот што го дава човекот, му отвора пат и до големците го доведува.

¹⁷Првиот по тужбата си е прав, но доаѓа противникот негов и го порекнува.

¹⁸Ждрепката прекинува расправии и решава спор меѓу силните.

¹⁹Навреден брат е понепристапен од утврден град, а караниците понепопустливи од затварало на кула.

²⁰Од плодот на устата на човекот се полни стомакот негов; од плодовите на устата своја тој се наситува.

²¹Смртта и животот му се потчинети на јазикот, и оние што го владеат, ќе вкусат од плодовите негови.

²²Кој нашол жена, нашол среќа и добил благодат од Господ.

²³Сиромавиот говори со молба, а богатиот одговара остро.

²⁴Кој сака да има пријатели, и сам треба да биде дружељубив; зашто има пријатели поприврзани од брат.