Read Свето Писмо: Стандардна Библија 2006 (со девтероканонски книги) Изреки 3 Bible Online

Изреки 3 - Свето Писмо: Стандардна Библија 2006 (со девтероканонски книги) bible

Изреки 3

¹Синко, не заборавај ја поуката моја и срцето твое да ги чува заповедите мои;

²зашто тие ќе ти придадат долги дни, години на живот и мир.

³Милоста и вистината да не бидат скудни во тебе: обеси ги на вратот свој, напиши ги врз плочите на срцето свое,

⁴па ќе најдеш милост и благоволение пред очите на Бога и на луѓето.

⁵Надевај се на Господ од сѐ срце и не се потпирај врз твојот разум.

⁶По сите свои патишта размислувај за Него, и Тој ќе ти ги покаже твоите патеки.

⁷Не сметај се за мудрец; имај страв од Господ и бегај од злото:

⁸тоа ќе биде здравје за твоето тело и лек за твоите коски.

⁹Давај Му принос на Господ од имотот твој и од првините на плодовите од твоите придобивки,

¹⁰и твоите житници ќе се исполнат до врвот, а твоите преси ќе се прелеваат од вино.

¹¹Не занемарувај ја, синко, казната од Господ, и да не ти е тешко од Неговото укорување;

¹²зашто кого Господ го сака, него и го кара, како и таткото синот свој што го љуби.

¹³Блажен е човекот, кој се здобил со мудрост, и човек, што спечалил разум;

¹⁴подобро е да ја добиеме неа, отколку ризници со сребро и злато;

¹⁵таа е поскапа и од скапоцените камења; и сѐ што ти е мило, не може да се спореди со неа.

¹⁶Во десницата нејзина е долговечноста, а во левицата ѝ е богатството и честа;

¹⁷патиштата нејзини се пријатни патишта, и сите патеки нејзини се спокојни.

¹⁸Таа е дрво на животот за оние, што ја придобиваат, и блажени се, оние кои ја запазуваат.

¹⁹Господ со мудрост ја основа земјата, со разум ги утврди небесата;

²⁰преку Неговата мудрост се отвораат бездните, и облаците пуштаат роса.

²¹Синко, не испуштај ги од превид овие работи; запази ја мудроста и разумот;

²²тие ќе бидат живот за душата твоја и украс на вратот твој;

²³тогаш ќе одиш безопасно по патот свој, и ногата твоја нема да се сопне.

²⁴Кога ќе легнеш да спиеш, нема да се плашиш, и кога ќе заспиеш, сонот ќе ти биде пријатен.

²⁵Нема да се исплашиш од ненадеен страв, ниту од напад, кој доаѓа од безбожниците,

²⁶бидејќи Господ ќе биде на сите твои патишта и ќе ја запази ногата твоја од препнување.

²⁷Не откажувај да му направиш добро на оној, кој има потреба, кога раката твоја има сила да му помогне.

²⁸Не вели му на пријателот свој: „Оди си и дојди пак; утре ќе ти дадам“ кога си во состојба да му помогнеш.

²⁹Не крој зло против ближниот свој, кога тој со доверба живее кај тебе.

³⁰Не карај се со човек без причина, кога не ти направил никакво зло.

³¹Не завидувај му на човек кој постапува насилно, и не избирај ни еден од патиштата негови,

³²зашто на Господ Му е одвратен безбожникот, а близок е со праведникот.

³³Проклетството Господово е врз домот на безбожниот, а живеалиштето на праведниот Бог го благословува.

³⁴Над оние што се подигруваат, Тој им се потсмева, а на смирените им дава благодат.

³⁵Мудрите ќе наследат слава, а безумните — срам.