Read Свето Писмо: Стандардна Библија 2006 (со девтероканонски книги) Проповедник 12 Bible Online

Проповедник 12 - Свето Писмо: Стандардна Библија 2006 (со девтероканонски книги) bible

Проповедник 12

¹И спомнувај си за твојот Творец во дните на младоста своја, додека не дошле тешки денови, додека не настанале години, за кои ќе речеш: „Не ми се мили“;

²додека сонцето и светлината на месечината и на ѕвездите не потемнеле, и не дошле нови облаци по дождот;

³додека не настапил оној ден, кога куќните стражари ќе затреперат, и силните мажи ќе се подгрбават, кога воденичките ќе престанат да мелат, бидејќи останале малку; кога ќе се помрачат оние, што гледаат низ прозорец;

⁴кога портата ќе почне да се затвора; кога ќе замолкне шумот на рачните мелници, и кога човек ќе почне да станува на птичји глас, и ќерките — пејачки ќе сопрат да пеат;

⁵кога висините за нив ќе бидат страшни, и по патот ќе има ужаси; кога ќе процути бадемот, и скакулецот ќе стане тежок, и желбата ќе помине; зашто човекот заминува во вечниот дом свој, и тажачките се готови да го опкружуваат по улица;

⁶додека не се скине конецот сребрен, и не се скрши златната чаша, и не се растури ведрото при изворот, и не падне тркалото на бунарот.

⁷И ќе се врати правот во земјата, како што си бил; а духот ќе се врати кај Бога, Кој го дал.

⁸Суета над суетите, вели проповедникот, сѐ е суета!

⁹Проповедникот не само што беше мудар, туку и го учеше народот на мудрост. Тој сѐ испитуваше, изучуваше и остави многу мудри изреки.

¹⁰Проповедникот се трудеше да најде убави мисли и точно ги запиша зборовите на вистината.

¹¹Зборовите на мудреците се како остени; како забиени клинци се нивните зборови, дадени од единствениот Пастир.

¹²А освен сето тоа, синко, пази се и од ова: да пишуваш многу книги — тоа нема крај, а да читаш многу — и тоа е заморно за телото.

¹³А суштината на сѐ е: имај страв од Бога и пази ги Неговите заповеди, зашто тоа му е сета должност на човекот;

¹⁴зашто Бог ќе ја изведе на суд секоја работа, и што е тајно, било да е добро или лошо.