Read Свето Писмо: Стандардна Библија 2006 (со девтероканонски книги) Проповедник 4 Bible Online

Проповедник 4 - Свето Писмо: Стандардна Библија 2006 (со девтероканонски книги) bible

Проповедник 4

¹Се свртев и ги видов сите неправди, што стануваат под сонцето; и ете, солзите на онеправданите, и утешител немаат; силата е во рацете на угнетувачите, а закрилник нема.

²Па си реков: блазе им на умрените, што умреле одамна, отколку на живите, што живеат досега;

³а поблажен е и од едните и од другите оној, што уште не постои, кој не ги видел лошите работи, што се вршат на земјата.

⁴А видов исто дека секој труд и секој успех во работите предизвикува меѓу луѓето заемна завист. Но и тоа е суета и мака за духот.

⁵Глупавиот седи со скрстени раце и го гризе своето сопствено тело.

⁶Подобро една шепа во мир, отколку две со труд и мака во духот.

⁷Се свртев и видов друга суета на земјата:

⁸човек осамен, нема близок: нема ни син, ни брат, а пак на сите работи негови крај нема, и очите негови не можат да се наситат со богатство. „За кого, пак, — вели тој — се трудам и ја лишувам од добра душата своја?“ — Ете, и тоа е суета и лоша работа.

⁹Подобро им е на двајца, отколку на еден, бидејќи имаат добра награда за трудот свој.

¹⁰Зашто, ако падне едниот, другиот ќе го крене другарот свој. Но тешко на еден, ако падне, ќе нема друг, кој да го крене.

¹¹Исто, кога лежат двајца, топло им е; а еден — како ќе се згрее?

¹²И, ако некој го надвие едниот, тоа двајца ќе го навасаат; и јажето, трипати усукано, нема лесно да се скине.

¹³Подобар е младинец сиромав и умен, отколку цар — неразумен и стар, кој веќе не умее да прима совети;

¹⁴зашто младиот може да излезе од темница и да стане цар, иако се родил сиромав во царството.

¹⁵Ги видов сите живи, што одат под сонцето, со вториот младич што ќе застане на негово место.

¹⁶Број немаше сиот оној народ, што беше пред него, иако подоцнежните нема да му се радуваат. И тоа е суета и гонење ветер.

¹⁷Чувај ја ногата своја, кога одиш во Божјиот дом, и биди готов повеќе да слушаш, отколку да гледаш како безумните принесуваат жртви, зашто тие не знаат дека вршат зло.