Read Свето Писмо: Стандардна Библија 2006 (со девтероканонски книги) Проповедник 6 Bible Online

Проповедник 6 - Свето Писмо: Стандардна Библија 2006 (со девтероканонски книги) bible

Проповедник 6

¹Има едно зло, што го видов на земјата, и тоа често е меѓу луѓето:

²Бог му дава на човекот богатство, имот и слава, и за душата негова нема скудности во ништо, што и да посака; но Бог не му дава нему да се ползува од тоа, туку се ползува од него друг човек: тоа е суета и тешко зло!

³Ако некој изнароди сто синови, проживее многу години и уште му се умножат дните на животот негов, а душата негова не се насладила на добро, та за него ќе нема дури ни погреб, подобро му е, велам, на недоносче отколку нему,

⁴зашто залудо дошло и отишло во темнина, и името му е покриено со мрак.

⁵Тоа дури и не го видело и не го познало сонцето: но поспокојно е од оној.

⁶А оној, макар да проживеал и две илјади години, без наслада од добрата, нема ли да појде сѐ на исто место?

⁷Сиот труд на човекот е за устата негова, но душата негова не може да се насити.

⁸А каква предност има умниот пред безумниот, каква — сиромавиот, кој умее да се однесува пред луѓето?

⁹Подобро е да гледаш со очи, отколку да посакуваш со душата. И тоа е суета и мака за духот.

¹⁰Она што постои, тоа е веќе наречено со име, и се знае дека е тоа — човекот, и дека тој не може да се препира со оној, што е посилен од него.

¹¹Има многу такви работи, што ја зголемуваат суетата: тогаш што е подобро за човекот?

¹²Зашто, кој знае што е добро за човекот во животот, во текот на сите дни на неговиот суетен живот, што тој ги поминува како сенка? И кој ќе му каже на човекот, што ќе стане по него на земјата?