Read Свето Писмо: Стандардна Библија 2006 (со девтероканонски книги) Исаија 19 Bible Online

Исаија 19 - Свето Писмо: Стандардна Библија 2006 (со девтероканонски книги) bible

Исаија 19

¹Пророштво за Египет. Ете, Господ ќе седне на лесен облак и ќе дојде во Египет. И пред лицето Негово ќе затреперат идолите египетски, а срцето на Египет ќе се стопи во Него.

²Ќе вооружам Египќани против Египќани, — и ќе се бијат брат против брат и пријател против пријател, град со град, царство со царство.

³Духот на Египет ќе изнемошти во него, ќе ги разруши намерите негови, — и ќе прибегнат тие кон идоли и маѓесници, кон оние што повикуваат мртовци и кон бајачи.

⁴Ќе ги предадам Египќаните во рацете на жесток владетел, свиреп цар ќе владее над нив, — вели Господ Бог Саваот.

⁵И водите во морето ќе исчезнат, реката ќе секне и ќе пресуши;

⁶реките ќе намалат, каналите египетски ќе станат малуводни и ќе се исушат; рогозината и трската ќе овенат.

⁷Нивите крај реката, по бреговите на реката, и сѐ што е посеано крај реката — ќе се исуши, ќе биде развеано и ќе исчезне.

⁸И ќе заплачат рибари, ќе викаат сите што фрлаат јадици во реката, што поставуваат мрежа во водата, сите ќе бидат очајни;

⁹ќе се вознемират оние, што обработуваат лен и што ткаат бели платна;

¹⁰мрежите ќе бидат скинати, и сите што држат рибници за жива риба — ќе паднат со духот.

¹¹Да! Се избезумија кнезовите цоански; советот на мудрите фараонови советници стана безумен. Како ќе му кажете на фараонот: „Јас сум син на мудреците, син на древните цареви?“

¹²Каде се тие? Каде се твоите мудреци? Нека ти кажат тие сега; нека дознаат што определил Господ Саваот за Египет?

¹³Се избезумија кнезовите цоански; се измамија кнезовите на Мемфис, го заведоа Египет водачите на неговите племиња.

¹⁴Господ спроведе во нив зашеметен дух, — го доведоа Египет во заблуда во сите негови дела, како пијан кога повраќа.

¹⁵И нема да има во Египет такво дело, кое би можеле да го извршат главата и опашката, палмата и трската.

¹⁶Во оној ден Египќаните ќе бидат како жени; ќе затреперат и ќе се уплашат од движењето на раката на Господ Саваот, што Тој ќе ја крене против нив.

¹⁷Земјата Јудина ќе стане ужас за Египет, кој се сеќава на неа, тој ќе затрепери од решението на Господ Саваот, што го определил Тој за него.

¹⁸Во оној ден пет града во египетската земја ќе говорат на ханански јазик, и ќе се колнат во Господ Саваот; едниот ќе се нарече град на сонцето.

¹⁹Во оној ден ќе има жртвеник на Господ среде египетската земја и споменик на Господ — во нејзините предели.

²⁰Тој ќе биде знак и сведоштво за Господ Саваот во египетската земја, зашто тие ќе викаат кон Господ од угнетувачите, и Тој ќе им донесе спасител и застапник, и ќе ги спаси.

²¹И Господ сам ќе се јави во Египет; во тој ден Египќаните ќе Го познаат Господа и ќе принесат жртви и дарови, ќе Му дадат ветувања на Господ и ќе ги исполнат.

²²И ќе го порази Господ Египет — ќе го порази и ќе го исцели: тие ќе се обратат кон Господ — и Тој ќе ги чуе и ќе ги исцели.

²³Во тој ден ќе има широк пат од Египет до Асирија; и Ашур ќе доаѓа во Египет и Египќани во Асирија; и Египќани заедно со Асирците ќе Му служат на Господ.

²⁴Во оној ден Израел ќе биде трет со Египет и со Асирија; благослов ќе има на земјата,

²⁵која Господ Саваот ќе ја благослови, велејќи: „Благословен да е Мојот народ — Египќаните, делото на рацете Мои — Асирците, и наследството Мое — Израел.“