Read Свето Писмо: Стандардна Библија 2006 (со девтероканонски книги) Исаија 28 Bible Online

Исаија 28 - Свето Писмо: Стандардна Библија 2006 (со девтероканонски книги) bible

Исаија 28

¹Тешко на Самарија, градот со кој се гордеат пијаниците Ефремови! Тешко му на свенатото цвеќе — негов гиздав украс — цвеќе среде наѓубрената долина на замаените од вино!

²Ете, јакиот и силниот во Господ како пороен дожд со град, како погубна луња, како разлеана поплава од бурни води, со рака ќе ги обори сите на земја.

³Со нозе ќе биде изгазен градот Самарија, со кој се гордеат Ефремовци.

⁴И со свенатото цвеќе — неговиот гиздав украс — цвеќе среде наѓубрената долина, ќе се случи истото, како што станува со смоквата, рано узреана: штом некој ќе ја види, веднаш ја кине со рака и ја изедува.

⁵Во тој ден Господ Саваот ќе биде убав венец и славна круна за остатокот од Својот народ.

⁶Дух на правосудие за оној што седи во судот и снага за оние, кои го отфрлуваат непријателот од портите.

⁷Но и тие се нишаат од виното и го збркуваат патот свој од жесток пијалак: свештеник и пророк се препнуваат од силни пијалаци; победени се од вино, избезумени од жесток пијалак, во гледањето се збркуваат, во судењето се сопнуваат.

⁸Зашто сите трпези се полни со одвратни блујавици, нема чисто место.

⁹А велат: „Кого сака тој да учи на знаење, и кого да вразумува со проповед? Дали деца, кои се одвикнати од градно млеко, одделени од мајчините гради?

¹⁰Зашто сѐ е заповед врз заповед, заповед врз заповед, правило врз правило, правило врз правило, тука малку и таму малку [3].“

¹¹Зашто со неразбирлив говор и на туѓ јазик ќе му се зборува на тој народ.

¹²Им говореа: „Еве одмор, дајте му одмор на изморениот, и ете му одмор.“ Но тие не сакаа да слушаат.

¹³И стана во нив според словото Господово: заповед врз заповед, заповед врз заповед, правило врз правило, правило врз правило, тука малку, таму малку, — така што тие одејќи да паднат на грб и да се разбијат, да паднат во стапица и да бидат уловени.

¹⁴И така, слушајте го словото Господово, хулители, управници на овој народ, кој е во Ерусалим.

¹⁵Бидејќи говорите: „Сме склучиле сојуз со смртта и со пеколот сме направиле договор: кога ќе минува камшикот, кој казнува сѐ, тој нема да дојде до нас, зашто лагата ја направивме наше засолниште и со измама ќе се прикриеме“, —

¹⁶затоа вака вели Господ Бог: „Ете, Јас полагам во основата на Сион камен, камен испитан, аголен, скапоцен, темелен: кој верува во него, нема да се посрами.

¹⁷Ќе ја поставам правдата за мерило и справедливоста за терезија; врнежи од град ќе го уништат засолништето на лагата, и води ќе го потопат местото на заклонот.

¹⁸И сојузот ваш со смртта ќе биде уништен, договорот ваш со пеколот нема да остане. Кога ќе мине камшикот, кој казнува сѐ, вие ќе бидете згазени.

¹⁹Секојпат кога ќе мине тој, ќе ве фати; а тој ќе оди секое утро, дење и ноќе и само слухот за него ќе предизвикува ужас.“

²⁰Многу кратка ќе биде постелката, за човек да се протега; многу тесна и покривката, за да се завитка со неа.

²¹Зашто Господ ќе се крене, како на гората Перасим; ќе се разгневи, како во долината Гаваон, за да го изврши делото Свое, необично дело, и да ја заврши работата Своја, Својата таинствена работа.

²²И така, не потсмевајте се, за да не станат оковите ваши поцврсти; зашто јас чув од Господ Бог Саваот дека е одредено истребување за целата земја.

²³Приклонете го увото и послушајте го гласот мој; бидете внимателни, ислушајте ја речта моја.

²⁴Земјоделецот секогаш ли ора, за да посее, секогаш ли ора бразди и ја израмнува земјата своја?

²⁵Не, откако ќе ја израмни површината, тој сее граор, распрскува ким или фрла пченица, на редови и јачмен во определеното место, а најпосле 'рж по сртовите.

²⁶И на таков ред го учи неговиот Бог; Тој го упатува.

²⁷Зашто не се врши граор со чукање, ниту тркалата што вршат го газат кимот; туку со стап го чукаат граорот, а со стап го чукаат и кимот.

²⁸Житото го вршат, но не го дробат; пуштаат преку него вршечки колца со коњи, но не го смачкуваат.

²⁹И тоа станува од Господ Саваот: чудни се неговите судови, голема е Неговата мудрост!