Read Свето Писмо: Стандардна Библија 2006 (со девтероканонски книги) Исаија 40 Bible Online

Исаија 40 - Свето Писмо: Стандардна Библија 2006 (со девтероканонски книги) bible

Исаија 40

¹Утешувајте го, утешувајте го Мојот народ, вели вашиот Бог;

²говорете му нежно на Ерусалим, и известете го дека времето на неговата казна се исполни дека за неправдата му е платено зашто од раката Господова доби двојно за сите свои гревови.

³Гласот на оној што вика во пустината говори: „Пригответе Му пат на Господ, исправете ги во пустината патеките за нашиот Бог;

⁴секој дол да се исполни, секоја планина и рид да се снизат; кривините да се исправат, и нерамните патишта да бидат израмнети;

⁵и ќе се јави славата Господова, и сите луѓе ќе го видат спасението од Бога; зашто устата Господова го изрече тоа.“

⁶Гласот говореше: „Разгласувај!“ и прашав: „Што да разгласувам?“ — „Секој човек е трева, сета убавина негова е како полско цвеќе.

⁷Тревата се исушува, цвеќето овенува, штом ќе дувне врз него здивот на Господ: така е и народот како трева.

⁸Тревата се суши, цвеќето свенува, а словото на нашиот Бог останува вечно.“

⁹Искачи се на високата гора Сион, ти кој јавуваш добри вести за Сион, извиши го силно гласот свој, благоизвестителе Ерусалиме, подигни го, не плаши се. Кажи им на градовите Јудини: еве Го вашиот Бог!

¹⁰Ете, Господ Бог иде со сила и раката Негова е со власт. Ете, наградата Му е со Него, а отплатата Му е пред лицето Негово.

¹¹Како пастир ќе го пасе Тој стадото Свое: јагнињата ќе ги земе Тој во рацете и ќе ги носи на градите Свои, и грижливо ќе ги води доилките.

¹²Кој ги измерил водите со раката своја и со педа го измерил небото, и со мерка го измерил правот земен, кој ги измерил на терезија планините и ридовите?

¹³Кој го упатил Духот на Господ, и Му бил Нему советник и Го учел?

¹⁴Со кого се советувал Тој, и кој Го вразумувал и Го поучувал во патот на правдата, и Го учел на знаење и Му го покажувал патот на мудроста?

¹⁵Ете, народите се како капка од ведро, и претставуваат прашинка на терезија. Ете, островите Тој ги подига како прашинки.

¹⁶Ни Ливан не стигнува за жртвен оган, ни животните по него — за сепаленица.

¹⁷Сите народи пред Него се како ништо, — за Него се помалку од ништо, и помалку се од суетата.

¹⁸И така, со кого ќе Го споредите Бога, и каква подобност ќе Му најдете?

¹⁹Уметникот го излева идолот, а златарот го покрива со злато и му додава сребрени веришки.

²⁰А кој е сиромав и нема што да му принесе, тој избира дрво, кое не гние, па бара искусен уметник за да направи идол, што ќе стои неподвижен.

²¹Зар не знаете? Зар не сте слушале? Зар не ви е зборувано во почетокот? Зар не сте го разбрале тоа од основањето на земјата?

²²Тој е Оној, Кој седи над кругот на земјата, а оние, што живеат на неа, се како скакулци пред Него; Тој ги распослал небесата како тенко платно и ги распнал како шатор за живеење.

²³Тој ги претвора кнезовите во ништо, судиите земни ги прави да бидат ништожни.

²⁴Одвај посадени, одвај посеани, одвај се закоренил во земјата стракот нивни, штом Тој ќе дувне врз нив, тие се исушуваат; виорот ги однесува како плева.

²⁵„Со кого ќе Ме изедначите и со кого ќе Ме споредите?“ — вели Светецот.

²⁶Кренете ги очите свои кон висините небесни и погледнете, кој ги создал? Кој го пресметал бројот на војската нивна? Тој сите нив ги нарекува по име: поради големата моќ и големата сила во Него ништо не недостига.

²⁷А како говориш ти, Јакове, и велиш, Израеле: „Патот ми е сокриен од Господ, делото мое е заборавено пред мојот Бог?“

²⁸Зар не знаеш? Зар не си слушал дека вечниот Бог, Кој ги создал краиштата на земјата, не се изморува и не изнемоштува; Неговиот разум е неиспитлив.

²⁹Тој му дава сила на уморениот и му дарува јачина на изнемоштениот.

³⁰Се уморуваат и момчињата и ослабуваат, и млади луѓе паѓаат,

³¹а оние кои се надеваат на Господ, ќе ја обноват силата своја: ќе кренат крилја како орли, ќе трчаат и нема да им биде тешко, ќе одат и нема да се уморат.