Read Свето Писмо: Стандардна Библија 2006 (со девтероканонски книги) Исаија 55 Bible Online

Исаија 55 - Свето Писмо: Стандардна Библија 2006 (со девтероканонски книги) bible

Исаија 55

¹Вие, што жедувате, дојдете сите при водите; дури и вие, кои немате пари, дојдете, купувајте и јадете; дојдете, купувајте вино и млеко без пари и без плаќање.

²Зошто да трошите пари за она, што не е леб, и заработката своја — за она, што не наситува? Послушајте Ме внимателно и јадете што е добро, и душата ваша нека се слади со сочни јадења.

³Приклонете го увото и дојдете при Мене; послушајте, и душата ваша ќе биде жива, — ќе склопам со вас вечен завет, неизменливи милости, ветени на Давид.

⁴Ете, Него го дадов сведок за народите, водач и заповедник на народите.

⁵Ете, ти ќе повикаш народ, што не си го познавал, и народите, кои не те познавале, ќе побрзаат кон тебе, заради Господа, твојот Бог, заради Светецот Израелов, зашто Тој те прослави.

⁶Барајте го Господа, додека можете да Го најдете; викајте Го додека е близу.

⁷Нечесниот нека го остави патот свој, и беззаконикот — помислите свои и нека се обрати кон Господ, нашиот Бог, — и Тој ќе го помилува, зашто е многу милостив.

⁸Моите мисли не се ваши мисли, ниту вашите патишта се Мои патишта, вели Господ.

⁹Но, како што е небото повисоко од земјата, така се и Моите патишта повисоки од вашите патишта, и мислите Мои повисоко од вашите мисли.

¹⁰Како што дождот и снегот паѓаат од небото и таму не се враќаат, туку ја напојуваат земјата и ја прават способна да раѓа и да се зеленее, за да му дава семе на оној, што сее и леб за да јаде,

¹¹така и Моето слово, што излегува од устата Моја, не се враќа кон Мене празно, туку го исполнува она, што Ми е угодно, и го прави она за што сум го испратил Јас.

¹²И така, вие ќе излезете во веселба и ќе бидете испратени со мир; горите и ридовите ќе пеат песна пред вас, и сите дрвја во полето ќе ракоплескаат.

¹³Место трн ќе израсне кипарис; место коприва ќе израсне мирта; и тоа ќе биде за слава на Господ, за вечен знак, неразрушив.