Read Свето Писмо: Стандардна Библија 2006 (со девтероканонски книги) Исаија 61 Bible Online

Исаија 61 - Свето Писмо: Стандардна Библија 2006 (со девтероканонски книги) bible

Исаија 61

¹Духот на Господ Бог е врз Мене, зашто Господ Ме помаза за да им благовествувам на бедните, Ме испрати да лекувам скрушени по срце, да им проповедам на заробените и на затворениците — отворање на темницата,

²да ја проповедам благопријатната Господова година и денот за одмазда на нашиот Бог; да ги утешам сите оние што тагуваат,

³да им соопштам на оние што тагуваат на Сион дека ним место пепел ќе им се даде украс, место плачење — мирисно масло на радост, место опаднат дух — славна облека; и ќе ги наречат дабови на правда, градина на Господ за Негова слава;

⁴и ќе ги изградат древните урнатини, ќе обноват стари урнатини и ќе подноват разурнати градови, запустени од дамнешни родови.

⁵Тогаш ќе дојдат туѓинци, и ќе ги пасат стадата ваши; синовите на туѓинците ќе бидат ваши земјоделци и ваши лозари.

⁶А вие ќе се нарекувате свештеници на Господ, — служители на нашиот Бог ќе ве нарекуваат; ќе се користите со имотот на народите и ќе се прославувате со нивните богатства.

⁷Заради тоа што бевте двојно посрамени, подбивот и срамот им беа наследство, затоа во земјата ќе добијат двојно; вечна веселба ќе има кај нив.

⁸Зашто Јас, Господ, ја сакам правдата, го мразам грабежот со насилството, и ќе им дадам награда според вистината и ќе направам со нив вечен завет;

⁹и семето нивно ќе биде познато меѓу народите, и потомството нивно — меѓу племињата; сите, што ќе ги видат, ќе познаат дека се тие семе благословено од Господ.

¹⁰Многу ќе се радувам во Господ, душата моја ќе се развесели во мојот Бог: зашто Тој ме облече во спасителна облека, ми облече облека на правда, како на младоженец ми стави венец и како невеста со накит ме украси.

¹¹Зашто — како што земјата ги произведува растенијата свои, и како што во градината расте сѐ што ќе се посее — така Господ Бог ќе направи да никне правда и слава пред сите народи.