Read Свето Писмо: Стандардна Библија 2006 (со девтероканонски книги) Исаија 66 Bible Online

Исаија 66 - Свето Писмо: Стандардна Библија 2006 (со девтероканонски книги) bible

Исаија 66

¹Вака вели Господ: небото е Мој престол, а земјата — подножје на нозете Мои; каде тогаш ќе изградите дом за Мене, каде е местото на Мојот спокој?

²Зашто, сето тоа го создаде Мојата рака, и сето тоа е Мое, вели Господ. А еве на кого ќе погледнам: на понизниот и скршениот по дух и на оној што трепери пред Моето слово.

³А кој коле вол, е исто, како оној што убива човек; кој принесува јагне за жртва, е исто, како оној што задушува куче; кој принесува дар, е исто, како оној што принесува свинска крв; кој кади темјан, е исто, како оној што се моли на идол. Тие го избрале тоа на своите патишта, и душата нивна наоѓа задоволство во одвратностите нивни, —

⁴така и Јас ќе ја употребам нивната измама и ќе го испратам врз нив она, што е за нив ужасно; зашто викав — и немаше кој да одговори, говорев — и тие не слушаа, а вршеа зло пред очите Мои и го избираа она што Ми беше неугодно.

⁵Чујте го словото на Господ вие, што треперите пред словото Негово: вашите браќа, кои ве мразат и кои ве гонат заради Моето име, велат: „Нека се јави Господ во Својата слава, па да ја видиме радоста ваша.“ Но тие ќе бидат посрамени.

⁶Ете, шум од градот, глас од храмот, глас од Господ, Кој дава отплата на непријателите Свои:

⁷Уште не беше почувствувала родилни маки, и роди; пред да настапат болките нејзини, роди син.

⁸Кој слушнал такво нешто? Кој видел слично на тоа? Никне ли од земјата во еден ден? Се раѓа ли народ наеднаш, како Сион: штотуку почна да се мачи од родилни болки, — ги роди синовите свои?

⁹Зар Јас кога ќе ја отворам утробата на мајката — таа нема да роди — вели Господ. Или Јас Кој давам да се роди, ќе ја заклучам ли утробата? — вели твојот Бог.

¹⁰Развеселете се со Ерусалим и радувајте се за него сите што го сакате! Радувајте се со него радосно сите што тагувавте по него,

¹¹за да се храните и наситувате од градите на утехите негови, да се опивате и насладувате од изобилната слава негова.

¹²Зашто вака вели Господ: „Ете, ќе навртам кон него мир како река, и богатство на народите — како поток, кој се разлива, за ваша наслада; на раце ќе ве носат и на колена ќе ве милуваат.

¹³Како што некого го утешува мајка, така ќе ве утешам и Јас; ќе бидете утешени во Ерусалим.

¹⁴И ќе го видите тоа, и ќе се зарадува срцето ваше, и коските ваши ќе цутат како свежо растение, и раката на Господ ќе се јави врз слугите Негови, а на непријателите свои Тој ќе се разгневи.

¹⁵Зашто, ете, ќе дојде Господ во оган, и колите Негови — како виор, за да го излее гневот свој со јароста и заканата Своја — со пламнат оган.

¹⁶Зашто Господ ќе суди со оган и со мечот Свој над секоја плот, и многумина ќе бидат убиени од Господ.

¹⁷Оние, што се посветуваат и очистуваат во градините еден по друг, кои јадат свинско месо и гадотии и глувци, — сите ќе загинат вели Господ.

¹⁸Зашто Јас ги знам делата нивни и мислите нивни; ете, ќе дојдам да ги соберам сите народи и јазици, и тие ќе дојдат и ќе ја видат славата Моја.

¹⁹И ќе ставам на нив белег, и од преживеаните меѓу нив ќе испратам кон народите: во Тарсис, во Пул и Луд, мајстори за оптегнување лак, во Тувал и во Јаван, и во далечните острови, кои не чуле за името Мое и не ја виделе славата Моја; и тие ќе им ја објават на народите славата Моја,

²⁰и ќе ги претстават сите ваши браќа од сите народи како дар на Господ на коњи и коли, на носилки, на маски и на брзи камили, — на Мојата света гора, во Ерусалим, вели Господ, — исто како што синовите Израелови принесуваат дар во домот Господов во чист сад.

²¹И од нив ќе земам свештеници и левити, вели Господ.

²²Зашто, како што новото небо и новата земја, кои Јас ќе ги создадам, ќе бидат секогаш пред лицето Мое, вели Господ, така ќе постои и потомството ваше и името ваше.

²³Тогаш од месец на месец, и од сабота во сабота ќе доаѓа секоја плот пред лицето Мое на поклонение, вели Господ.

²⁴И ќе излегуваат и ќе ги видат труповите на луѓето што отстапиле од Мене; зашто црвот нивни нема да умре, ниту огнот нивни ќе угасне и ќе бидат одвратност за секоја плот.“