Read Свето Писмо: Стандардна Библија 2006 (со девтероканонски книги) Левитска 17 Bible Online

Левитска 17 - Свето Писмо: Стандардна Библија 2006 (со девтероканонски книги) bible

Левитска 17

¹И му рече Господ на Мојсеј, велејќи:

²„Кажи му на Арон и на синовите негови и на сите синови израелски и речи им: еве што заповеда Господ:

³ако некој од домот Израелов заколе вол или овца, или коза во населбата, или надвор од населбата,

⁴а не го доведе кај влезот од скинијата на собранието, за да Му принесе дар на Господ пред живеалиштето Негово, тогаш тој човек да се обвини за крв: тој пролеал крв, да се истреби од народот негов.

⁵Така да ги принесуваат синовите израелски жртвите свои, што ги колат в поле и да ги донесуваат пред Господ крај влезот од скинијата на собранието, кај свештеникот, и да ги колат пред Господ како жртви за мир,

⁶и да попрска свештеникот со крв околу жртвеникот Господов крај влезот од скинијата на собранието и да го запали лојот за благопријатен мирис пред Господ.

⁷И да не принесуваат во иднина жртви свои на идоли, во кои самите блудствуваат. Ова нека биде вечна наредба и за поколенијата ваши.

⁸Кажи им уште: ако некој од домот Израелов или од придојдените, што живеат меѓу вас, принесува сепаленица или жртва

⁹и не ја донесе крај влезот од скинијата на собранието, за да ја принесе пред Господ, таа душа да се истреби од народот свој.

¹⁰Ако, пак, некој од домот Израелов или од придојдените, што живеат меѓу вас, јаде каква и да било крв, тогаш Јас ќе го свртам лицето Мое против душата на оној, што ќе јаде крв, и ќе го истребам од народот,

¹¹зашто душата на секое тело е во неговата крв, и Јас ви ја дадов за жртвеникот за да ги очистувате душите ваши, бидејќи таа крв ја очистува душата.

¹²Поради тоа и им реков на синовите израелски: ниедна душа меѓу вас не смее да јаде крв, па ни придојдениот, кој живее меѓу вас, не смее да јаде крв.

¹³А, ако некој од синовите израелски и од придојдените, кои живеат меѓу вас, фати во лов диво животно или птица, што се јаде, да ја пушти крвта да истече и да ја покрие со земја,

¹⁴зашто душата на секое тело е во крвта негова и затоа им реков на синовите на Израел: не јадете крв од никакво тело, бидејќи душата на секое тело е во крвта негова; секој што ќе ја јаде, ќе биде истребен.

¹⁵И секој кој јаде мрша или ѕверојадина, ваш или придојден, нека ја испере облеката своја, и да го измие телото свое со вода и ќе биде нечист до вечерта, а потоа ќе биде чист.

¹⁶Ако, пак, не ја испере, и не го измие телото свое со вода, ќе го прими своето беззаконие врз себе.“