Read Свето Писмо: Стандардна Библија 2006 (со девтероканонски книги) Левитска 24 Bible Online

Левитска 24 - Свето Писмо: Стандардна Библија 2006 (со девтероканонски книги) bible

Левитска 24

¹И му рече Господ на Мојсеј, велејќи:

²„Заповедај им на синовите израелски да земат чисто маслиново масло, исцедено за светење, та светлото да гори секогаш

³пред завесата во скинијата на собранието, а ќе го пали Арон постојано пред Господ од вечерта, дури до утрината; и тоа нека ви биде вечна наредба во родовите ваши.

⁴На чист светилник распоредете ги светилата кои ќе горат постојано пред Господ;

⁵и земете пченично брашно и измесете од него дванаесет лебови — секој леб да тежи по две десетини од ефа;

⁶поставете ги во два реда, по шест во ред, на чистата трпеза пред Господ.

⁷И во секој ред ставете и чист темјан; и тоа нека биде крај лебовите како спомен — жртва за Господ.

⁸Секој саботен ден постојано да се принесуваат лебови пред Господ од синовите израелски: тоа е вечен завет.

⁹Тие да му припаѓаат на Арон и на синовите негови за да ги јадат на свето место; тоа е голема светиња за нив од жртвите Господови, овековечена со закон.“

¹⁰Тогаш излезе синот на една жена Израелка, што го беше родила со Египќанец, меѓу синовите Израелови и се скара со еден Израелец во населбата;

¹¹и синот на Израелката похули на Името. И го доведоа кај Мојсеј; името на мајка му беше Шеломит, Дивриева ќерка од племето Даново;

¹²па го ставија в затвор додека не се донесе за него пресуда според заповедта Господова.

¹³И му рече Господ на Мојсеј, велејќи:

¹⁴„Изведи го оној што хулеше надвор од логорот, а сите што чуја, нека ги стават рацете свои врз главата негова и целиот народ нека го убие со камења,

¹⁵и кажи им на синовите израелски: секој што ќе похули на својот Бог, ќе го прими својот грев;

¹⁶и оној што ќе го навреди името Господово, треба да умре, со камења да го убие сиот народ; било да е тој придојден или тукашен, ако похули на името Господово, да умре.

¹⁷Кој ќе убие човек, да биде умртвен.

¹⁸Кој ќе удри добиток и тој умре, да го плати; добиток за добиток.

¹⁹На оној, што ќе му нанесе повреда на ближен, да му се направи и нему она што го направил тој;

²⁰прелом за прелом, око за око, заб за заб; како што му нанел повреда на човек, така и нему да му се направи.

²¹Кој ќе убие добиток, нека го плати, но кој удри човек и умре, да биде умртвен.

²²Една правда да има како за придојден така и за тукашен, затоа што Јас сум Господ, вашиот Бог.“

²³Така Мојсеј им зборуваше на синовите израелски. И го изведоа оној што беше похулил надвор од населбата и го убија со камења; синовите на Израел направија така, како што му беше заповедал Господ на Мојсеј.