Read Свето Писмо: Стандардна Библија 2006 (со девтероканонски книги) Левитска 26 Bible Online

Левитска 26 - Свето Писмо: Стандардна Библија 2006 (со девтероканонски книги) bible

Левитска 26

¹„Не правете ракотворни образи, ни делкани; и не издигајте столб и не поставувајте во земјата камења со знаци, за да им се поклонувате, зашто Јас сум Господ, вашиот Бог.

²Пазете ги Моите саботи и почитувајте го Моето светилиште; Јас сум Господ.

³Ако постапувате според Моите повелби и ги запазувате Моите наредби, и ги исполнувате,

⁴ќе ви давам дожд навреме, и земјата ќе го даде родот свој, и дрвјата полски ќе го дадат својот плод,

⁵и вршидбата ќе трае кај вас до гроздоберот, гроздоберот ќе трае до сеидбата, и ќе јадете свој леб до наситка и ќе живеете безбедно во вашата земја.

⁶Ќе ѝ дадам мир на земјата; ќе спиете и никој нема да ве обеспокојува; ќе ги истребам лутите ѕверови од земјата и меч нема да помине по целата ваша земја.

⁷Па ќе ги гоните непријателите ваши, и тие од меч ќе паднат убиени пред вас;

⁸петмина од вас ќе прогонуваат сто души, и сто од вас ќе прогонуваат десет илјади, и непријателите ваши ќе паднат од меч пред вас.

⁹Ќе погледнам благонаклоно на вас и ќе ве направам плодни, ќе ве умножам и ќе го зацврстам заветот Мој со вас.

¹⁰И ќе јадете од старото — ланското и старото ќе го исфрлите поради новото.

¹¹Ќе го поставам живеалиштето Мое меѓу вас, и душата Моја нема да се гнаси од вас.

¹²Ќе се движам меѓу вас и ќе бидам ваш Бог, а вие ќе бидете Мој народ.

¹³Јас сум Господ, Бог ваш, Кој ве изведе од египетската земја, за да не бидете нивни робови, и ги скршив стегите на јаремот ваш и ве изведов охрабрени.

¹⁴Ако, пак, не Ме слушате и не ги исполнувате овие Мои повелби,

¹⁵и не им се покорувате, и ако душата ваша негодува од Моите закони, така што нема да ги исполнувате сите Мои заповеди, и го нарушите заветот Мој, —

¹⁶тогаш и Јас ќе постапам со вас вака — ќе ви пратам офтика и врела треска, од кои ќе ослабат очите ваши и ќе се измачува душата ваша, и ќе сеете семе залудо, зашто непријателите ваши ќе го јадат.

¹⁷Ќе го свртам лицето Мое против вас и ќе паднете пред непријателите ваши; над вас ќе владеат непријателите ваши, и ќе бегате дури и кога никој не ве гони.

¹⁸Ако и покрај сето ова не Ме послушате, седумпати ќе ја зголемам казната за гревовите ваши;

¹⁹ќе ја скршам вашата тврдоглавост, ќе го направам небото ваше како железо, и земјата ваша како бакар;

²⁰па залудо ќе се истоштува силата ваша, и земјата ваша нема да го дава својот плод, и дрвјата земни нема да ги раѓаат плодовите свои.

²¹Ако, пак, и потоа тргнете настрана и не сакате да Ме слушате, ќе ви нанесам седумкратни удари поради гревовите ваши;

²²ќе испратам против вас диви ѕверови, кои ќе ви ги одземат децата ваши, ќе го уништат добитокот ваш и ќе ве намалат, така што ќе се запустат патиштата ваши.

²³Ако и потоа не се поправите и тргнете против Мене,

²⁴тогаш и Јас ќе тргнам против вас со јарост и ќе ве поразам седумкратно за гревовите ваши.

²⁵И ќе испратам против вас одмаздувачки меч за одмазда поради заветот; ако, пак, избегате по градовите ваши, ќе испратам на вас помор и ќе бидете предадени во рацете на непријателот.

²⁶Ќе оскудевате за леб; десет жени ќе го печат лебот ваш во една печка и ќе ви даваат леб со мерка; ќе јадете и нема да се наситите.

²⁷Ако и покрај сево ова не Ме послушате и тргнете против Мене,

²⁸и Јас ќе тргнам против вас со гнев и седумкратно ќе ве казнам за гревовите ваши,

²⁹и ќе ги јадете телата на синовите свои, и телата на ќерките ваши ќе ги јадете.

³⁰Ќе ги разрушам жртвениците ваши, ќе ги разрушам ракотворните столбови ваши и ќе ги фрлам труповите ваши врз урнатините од идолите ваши, и душата Моја ќе се одврати од вас.

³¹Градовите ваши ќе ги претворам во пустина и ќе ги опустошам светилиштата ваши, и нема да примам благопријатен мирис од жртвите ваши.

³²Ќе ја запустам земјата ваша, така што ќе се чудат над неа непријателите ваши, што ќе живеат во неа;

³³вас, пак, ќе ве растурам меѓу народите и ќе направам да ве гонат со изваден меч; земјата ваша ќе биде пуста, и градовите ваши — разрушени.

³⁴Тогаш земјата ќе надомести за своите саботи преку сите денови, додека биде пуста; додека вие бидете во земјата на непријателите ваши, земјата ќе си почива и ќе надомести за своите саботи;

³⁵таа ќе почива за сето време додека биде пуста, што не почиваше за сите саботи ваши кога живеевте во неа.

³⁶А на оние од вас што ќе останат, ќе им всадам страв во срцата во земјата на непријателите нивни, па и шумот од развеан лист ќе ги плаши; ќе бегаат како од меч, и ќе паѓаат кога и никој не ги гони.

³⁷И ќе се сопнуваат еден од друг како да бегаат од меч, иако никој не ги прогонува; не ќе имате сила да им се противставувате на непријателите ваши;

³⁸ќе загинете меѓу народите, и ќе ве проголта земјата на непријателите ваши;

³⁹а другите од вас ќе истлеат поради беззаконијата свои во земјите на непријателите ваши и поради беззаконијата на татковците ваши ќе исчезнат.

⁴⁰Тогаш ќе ги исповедаат беззаконијата свои и беззаконијата на татковците свои, признавајќи дека вршеа престапи против Мене и дека се дигнаа против Мене;

⁴¹поради што и Јас станав против нив и ги одведов во земјата на непријателите нивни; тогаш ќе биде понижено нивното необрезано срце, и тогаш ќе ја искупат својата неправедност.

⁴²И Јас ќе си спомнам за заветот Мој со Јаков, и на заветот Мој со Исак, и на заветот Мој со Авраам, и на земјата ќе се сетам

⁴³и земјата, напуштена од нив, ќе надомести за своите саботи, откако ќе биде испразнета од нив, и тие ќе ја добијат својата казна за беззаконијата свои, зашто ги презреа законите Мои и душата нивна се одврати од наредбите Мои.

⁴⁴Но кога тие ќе бидат во земјата на непријателите свои, — Јас нема да ги презрам, и нема да се налутам на нив толку, за да ги истребам и да го раскинам Мојот завет со нив, зашто Јас сум Господ, нивниот Бог.

⁴⁵Ќе се сетам, заради нив, на заветот со нивните предци, кои ги изведов од египетската земја пред очите на народите, за да им бидам Бог. Јас сум Господ.“

⁴⁶Тоа се наредбите, заповедите и законот кои Господ ги воспостави меѓу Себе и синовите на Израел преку Мојсеј на планината Синај.