Read Свето Писмо: Стандардна Библија 2006 (со девтероканонски книги) Левитска 27 Bible Online

Левитска 27 - Свето Писмо: Стандардна Библија 2006 (со девтероканонски книги) bible

Левитска 27

¹И му рече Господ на Мојсеј, велејќи:

²„Кажи им на синовите израелски и речи им: ако некој се заветува да ја посвети душата своја на Господ со цена,

³цената за маж од дваесет до шеесет години да биде педесет сребрени шекели, според свештениот шекел.

⁴Ако е, пак, за жена, цената да биде триесет шекели.

⁵За машко од пет до дваесет години цената да биде дваесет шекели, а за женско — десет шекели.

⁶За машко, пак, од еден месец до пет години цената треба да изнесува пет сребрени шекели, а за женско — три сребрени шекели.

⁷За маж од шеесет години и нагоре цената ќе биде петнаесет сребрени шекели, а за жена — десет шекели.

⁸Ако е сиромав и нема да плати според цената своја, тогаш тој нека се претстави пред свештеникот, и свештеникот нека го процени: според состојбата на оној, што се заветувал, така нека го процени свештеникот.

⁹Ако е, пак, добиче од оние што Му се принесуваат како жртва на Господ, — сѐ што Му се принесува на Господ, е свето;

¹⁰да не се заменува доброто со лошо, или лошото со добро; ако некој замени добиче со добиче тогаш и добичето и неговата замена ќе бидат светиња.

¹¹Ако е тоа нечист добиток, што не се принесува како жртва на Господ, тој нека му биде претставен на свештеникот,

¹²и свештеникот да процени, дали е тој добар, или лош; како ќе го оцени свештеникот, така и нека биде;

¹³ако некој сака да го откупи, нека додаде кон цената уште една петина.

¹⁴Ако некој Му ја посветува на Господ куќата своја за светиња, свештеникот да ја процени, дали е таа добра, или лоша; како што ќе ја оцени свештеникот, така и да биде.

¹⁵Ако оној што ја посветил, побара да ја откупи куќата своја, нека приложи уште една петина во сребро кон цената нејзина, и тогаш таа нека биде негова.

¹⁶Ако некој Му посвети на Господ од имотот свој нива, процената треба да биде сразмерно со посеаното: за еден гомер посеан јачмен — педесет сребрени шекели.

¹⁷Ако некој ја посветува нивата своја од јубилејната година, тоа треба да биде според нејзината проценка.

¹⁸Ако некој ја посветува нивата своја по јубилејната година, свештеникот нека ја определи цената во сребро според годините што остануваат до идната јубилејна година, и за толку да ја намали цената.

¹⁹Ако оној, што ја посветил нивата своја, побара да ја откупи, нека додаде уште една петина во сребро кон цената нејзина, и таа нека биде негова.

²⁰Ако, пак, тој не ја откупи нивата своја и нивата биде продадена на друг човек, тој веќе не може да ја откупи;

²¹таа нива, откако ќе биде ослободена во јубилејната година, нека Му биде посветена на Господ како боговетена земја и да биде за свештеникот.

²²Ако некој Му посвети на Господ купена нива, која не е под нивите на имотот негов,

²³свештеникот нека ја определи цената нејзина до јубилејната година, и тој да ја даде, според она како што е пресметано, во истиот ден, како светиња Господова;

²⁴а нивата во јубилејната година пак нека му се врати на оној, од кого била купена и кој владеел со таа земја.

²⁵Секоја проценка да се врши според свештениот шекел — дваесет гери да има во еден шекел.

²⁶А секое првородено што ќе се роди меѓу добитокот твој, никој не може да го заветува: било од крупниот, било од ситниот добиток — тие се Господови.

²⁷Ако, пак, добитокот е нечист, да се откупува според цената негова и да се додаде кон неа уште една петина; ако не се откупи, тогаш нека се продаде според неговата проценка.

²⁸А сѐ што човек Му ветува на Господ со клетва од она што го има — од човек до добиток или нива од имотот свој, да не се продава ниту да се откупува: секој завет со клетва е најсвета светиња Господова.

²⁹И секое човечко суштество, со херем [3] проколнато, не може да се откупи: тоа треба да се предаде на смрт.

³⁰И секоја десетина од земјата: од земните семиња и од плодовите на дрвјата, Му припаѓаат на Господ: тоа е светиња Господова;

³¹ако некој посака да ја откупи десетината своја, да додаде кон цената нејзина уште една петина.

³²И секој десеток од крупниот и од ситниот добиток — сѐ десето што ќе помине под пастирски стап, треба да Му се посвети на Господ;

³³и да не се гледа дали е добро или лошо, ниту да се заменува; ако некој го замени, тогаш тоа самото и неговата замена да бидат светиња — да не се откупуваат.“

³⁴Тоа се заповедите, што Господ им ги даде на синовите израелски преку Мојсеј на планината Синај.