Read Свето Писмо: Стандардна Библија 2006 (со девтероканонски книги) Левитска 8 Bible Online

Левитска 8 - Свето Писмо: Стандардна Библија 2006 (со девтероканонски книги) bible

Левитска 8

¹И му рече Господ на Мојсеј, велејќи:

²„Земи го Арон и синовите негови и одеждите, и масло за помазание, и теле како жртва за грев, и два овна, и кошница пресни лебови,

³па собери го целиот народ пред вратата од скинијата на собранието.“

⁴И направи Мојсеј како што му заповеда Господ, и се собра народот пред вратата од скинијата на собранието.

⁵Потоа му рече Мојсеј на народот: „Еве што заповеда Господ да се направи.“

⁶Па го доведе Мојсеј Арона и синовите негови и ги изми со вода.

⁷И му облече хитон, и го опаша со појас, го облече со горна одежда, па му стави згора на тоа ефод, и го опаша појасот од ефодот наоколу, и го стегна со него,

⁸а на градите одозгора му стави наградник, и на наградникот постави и „урим“ и „тумим“ [1].

⁹Му стави уште на главата и кидар, а на капата спроти лицето му стави златна плочка, знак на светоста, како што му заповеда Господ на Мојсеј.

¹⁰И го зеде Мојсеј маслото за помазание и ја помаза скинијата и сѐ што е во неа, и ја освети.

¹¹И го попрска со него жртвеникот седумпати, и го помаза жртвеникот, и сите работи на него, и мијалникот, и подножјето негово, и ги освети.

¹²И излеа од маслото за помазание врз главата Аронова, и го помаза и го освети;

¹³потоа Мојсеј ги доведе синовите Аронови, им облече хитони, ги опаша со појаси, им стави капи на главите, како што му беше заповедал Господ.

¹⁴Потоа го доведе телето како жртва за грев, а Арон и синовите негови ги ставија рацете свои врз главата на телето за грев.

¹⁵Потоа Мојсеј го закла телето и зеде од крвта негова и со прстот свој стави од неа на роговите од жртвеникот од сите страни, и го очисти жртвеникот, а другата крв ја излеа во подножјето на жртвеникот, и го освети за да се извршува обредот очистување на гревовите пред него.

¹⁶Потоа го извади сиот лој што беше на утробата, и кошулката од црниот дроб, како и двата бубрега, и лојот околу нив, и сето тоа го изгоре врз жртвеникот.

¹⁷А телето, со кожата негова и месото негово и нечистотијата ги изгоре со оган надвор од логорот како што му беше заповедал Господ на Мојсеј.

¹⁸Потоа го доведе овенот како жртва сепаленица, а Арон и синовите негови ги ставија рацете свои врз главата на овенот;

¹⁹и Мојсеј го закла и го попрска со крвта негова жртвеникот од сите страни,

²⁰па го исече овенот на делови, и ги изгори Мојсеј главата, и деловите, и лојот;

²¹а утробата и нозете ги изми со вода, и го изгоре Мојсеј целиот овен на жртвеникот: тоа е жртва сепаленица со пријатен мирис; тоа е принос пред Господ, како што му беше заповедал Господ на Мојсеј.

²²Потоа го доведе вториот овен — овенот за посветување; и Арон и синовите негови ги ставија рацете свои врз главата на овенот.

²³Па, откако го закла, зеде Мојсеј од крвта негова и го помаза со неа крајчето од десното уво на Арон и палецот на десната рака негова, и палецот на десната нога негова.

²⁴Ги доведе Мојсеј и синовите Аронови, па и ним им го помаза со крв крајот од десното уво, палецот на десната рака и палецот на десната нога; а со другата крв Мојсеј го попрска жртвеникот наоколу.

²⁵Потоа ги зеде лојот, опашката и лојот што беше на утробата, кошулката од црниот дроб, како и двата бубрега и лојот околу нив, и десната плешка,

²⁶а од кошницата со бесквасни лебови што е пред Господ зеде еден бесквасен леб, еден леб со масло, како и една питка, па ги стави врз лојот и врз десната плешка.

²⁷И сето тоа му го предаде на Арон в раце и во рацете на синовите негови и го принесе како жртва пред Господ.

²⁸Потоа го зеде тоа Мојсеј од рацете нивни и го изгоре на жртвеникот заедно со жртвата сепаленица; тоа е жртва за посветување со пријатен мирис, принос пред Господ.

²⁹Па ги зеде Мојсеј градите и ги принесе пред Господ; тоа е Мојсеев дел од овенот за посветување, како што му беше заповедал Господ на Мојсеј.

³⁰Потоа зеде Мојсеј од маслото за помазание и од крвта, што беше на жртвеникот, па го попрска Арон и одеждите негови, и синовите негови, и одеждите нивни; и така го освети Арон и одеждите негови, синовите негови и одеждите нивни.

³¹И му рече Мојсеј на Арон и на синовите негови: „Сварете го ова месо пред влезот во скинијата на собранието, и јадете го таму со лебот што е во кошницата за посветување, како што ми се заповеда и рече, Арон и синовите негови нека го јадат тоа.

³²А она, што ќе остане од месото и од лебот, изгорете го со оган.

³³И не оддалечувајте се од вратата на скинијата на собранието седум дена, додека не се завршат деновите на посветувањето ваше, зашто за седум дена ќе се изврши посветувањето ваше.

³⁴Како што се направи денес, така да се прави секогаш според Господовата заповед, за да се очистите од гревот.

³⁵Затоа пред влезот од скинијата на собранието стојте дење и ноќе седум дена и така запазите ги заповедите Господови, за да не умрете, зашто така ми е заповедано.“

³⁶А Арон и синовите негови направија сѐ онака, како што им беше заповедал Господ преку Мојсеј.