Read Свето Писмо: Стандардна Библија 2006 (со девтероканонски книги) Еремија 1 Bible Online

Еремија 1 - Свето Писмо: Стандардна Библија 2006 (со девтероканонски книги) bible

Еремија 1

¹Зборови на Еремија, — син на Хелкија, еден од свештениците кој живееше во Анатот, во земјата Венијаминова, —

²кому му беше упатено слово Господово во времето на Јошија, син на јудејскиот цар Амон, во тринаесеттата година од царувањето негово,

³а и во деновите на Јоаким, синот на јудејскиот цар Јошија, до крајот на единаесеттата година од царувањето на Седекија, син на јудејскиот цар Јошија, до поробувањето на Ерусалим во петтиот месец.

⁴И ми беше упатено слово Господово:

⁵„Пред да те обликувам во утробата, Јас те познавав, и пред да излезеш од утробата, те посветив: те поставив за пророк на народите.“

⁶Јас, пак, одговорив: „О, Господи Боже, не умеам да говорам, зашто сум уште млад.“

⁷Но Господ ми рече: „Не вели: — млад сум; — зашто до сите до кои ќе те испратам ќе одиш и сѐ што ќе ти заповедам ќе кажеш.

⁸Не плаши се од нив; зашто Јас сум со тебе, за да те избавам“, рече Господ.

⁹И ја протегна Господ раката и се допре до устата моја; и ми рече Господ: „Ете, Јас ги ставив Моите зборови во устата твоја.

¹⁰Гледај, Јас те поставив денес над народи и царства, за да искоренуваш и разурнуваш, да погубуваш и да разрушуваш, да ѕидаш и да насадуваш.“

¹¹И пак беше упатено слово Господово до мене: „Што гледаш, Еремија?“ Одговорив: „Гледам гранка од бадемово дрво.“

¹²Господ ми рече: „Добро гледаш, зашто Јас бдеам над Моето слово, за да се изврши.“

¹³И по вторпат беше упатено слово Господово кон мене: „Што гледаш?“ Одговорив: „Гледам котел што врие, а отворот му е кон север.“

¹⁴И ми рече Господ: „Од север ќе букне злото врз сите луѓе што живеат на земјата.

¹⁵Зашто, ете, Јас ќе ги свикам сите племиња на северните царства — вели Господ — и тие ќе дојдат, и секој ќе го постави престолот свој при влезот на ерусалимските порти, околу сите ѕидишта негови и во сите јудејски градови.

¹⁶И ќе го изречам судот Свој врз нив за сите нивни беззаконија, затоа што Ме оставија и кадеа темјан на други богови и им се поклонуваа на идоли, дела од нивните раце.

¹⁷А ти препаши ги бедрата свои и стани, та кажи им сѐ што ќе ти заповедам; не треси се пред нив, за да не те стресам Јас пред очите нивни.

¹⁸И ете, Јас те поставив денес како утврден град, како железен столб и како бронзен ѕид против сите цареви Јудини и кнезовите на целата таа земја, против свештениците негови и против народот на таа земја.

¹⁹Тие ќе војуваат против тебе, но нема да те победат; зашто Јас сум со тебе, за да те избавувам“ — вели Господ.