Read Свето Писмо: Стандардна Библија 2006 (со девтероканонски книги) Еремија 24 Bible Online

Еремија 24 - Свето Писмо: Стандардна Библија 2006 (со девтероканонски книги) bible

Еремија 24

¹Господ ми покажа две кошници со смокви, поставени пред храмот Господов, откако вавилонскиот цар Навуходоносор го изведе од Ерусалим заробениот јудејски цар Јехонија, синот Јоакимов, и јудејските кнезови со дрводелците и ковачите и ги одведе во Вавилон;

²едната кошница беше полна со многу добри смокви, какви што се раните смокви, а втората кошница — со смокви, многу лоши, кои поради лошиот вкус не можеа да се јадат.

³И ме праша Господ: што гледаш, Еремија? — Јас одговорив; убавите смокви се многу добри, а лошите — многу лоши, така што не можат да се јадат, зашто не се вкусни воопшто.

⁴И дојде слово Господово до мене:

⁵вака вели Господ, Бог Израелов — како овие добри смокви Јас ќе ги препознаам добрите изгнаници јудејски, што ги истерав од ова место во земјата Халдејска.

⁶И ќе ги свртам кон нив очите Мои за нивно добро и ќе ги вратам во оваа земја, и ќе ги подигнам, нема да ги сосипам, и ќе ги посадам, а не да ги искоренам;

⁷и ќе им дадам срце, за да знаат дека Јас сум Господ, и тие ќе бидат Мој народ. Јас пак ќе им бидам нивни Бог, зашто тие ќе се обратат кон Мене од сѐ срце.

⁸А за лошите смокви, кои не можат да се јадат поради нивниот вкус, така вели Господ: такви ќе ги направам јудејскиот цар Седекија и кнезовите негови, и другите ерусалимци, што ќе останат во оваа земја и што ќе живеат во египетската земја;

⁹и ќе ги предадам на зло и тешко страдање во сите земни царства, за поруга и за приказ, за потсмев и за проклетство по сите места, каде што ќе ги растурам.

¹⁰Па ќе испратам врз нив меч, глад и помор, додека не ги истребам од земјата што им ја дадов ним и на татковците нивни.