Read Свето Писмо: Стандардна Библија 2006 (со девтероканонски книги) Еремија 28 Bible Online

Еремија 28 - Свето Писмо: Стандардна Библија 2006 (со девтероканонски книги) bible

Еремија 28

¹Во истата година, во почетокот на царувањето на јудејскиот цар Седекија, во четвртата година, во петтиот месец, Ананија, синот Азуров, пророк од Гаваон, зборуваше во домот Господов пред свештениците и сиот народ, велејќи:

²— вака вели Господ Саваот, Бог Израелов: ќе го скршам јаремот на вавилонскиот цар;

³по две години ќе ги вратам во ова место сите садови од домот Господов, кои вавилонскиот цар Навуходоносор ги зеде одовде и ги однесе во Вавилон;

⁴и јудејскиот цар Јехонија, синот Јоакимов, и сите заробени Јудејци, што отидоа во Вавилон, ќе ги вратам на ова место, вели Господ; бидејќи ќе го скршам јаремот на вавилонскиот цар.

⁵И му рече пророкот Еремија на пророкот Ананија пред сите свештеници и пред сиот народ, кој стоеше во домот Господов,

⁶па кажа пророкот Еремија: нека биде така, нека го изврши тоа Господ, нека ги исполни Господ зборовите твои што ги изрече за враќањето од Вавилон на садовите од домот Господов на ова место и за сите заробени!

⁷Само, чуј го зборот што ќе ти го кажам, чуј го ти, а нека го чуе и сиот народ;

⁸пророците, што беа пред мене и пред тебе, им претскажуваа на многу земји и на големи царства — војна, беда и помор.

⁹Ако некој пророк претскажал мир, само тогаш бил признаван за пророк навистина испратен од Господ, кога ќе се исполнел зборот на тој пророк.

¹⁰Тогаш пророкот Ананија го зеде јаремот од вратот на пророкот Еремија и го скрши.

¹¹И рече Ананија пред сиот народ: „Вака вели Господ — ете, така ќе го строшам јаремот на вавилонскиот цар Навуходоносор по две години, откако ќе го извадам од вратот на сите народи. Тогаш си отиде Еремија по својот пат.

¹²И беше упатено слово Господово до Еремија, откако пророкот Ананија го скрши јаремот од вратот на пророкот Еремија:

¹³оди и кажи му на Ананија — вака вели Господ: ти го скрши дрвениот јарем, но место него направи железен.

¹⁴Зашто така вели Господ Саваот, Бог Израелов: железен јарем ќе им ставам на вратот на сите овие народи за да му работат на вавилонскиот цар Навуходоносор, и тие ќе му служат; дури и ѕверовите полски нему му ги предадов.“

¹⁵Па му рече пророкот Еремија на пророкот Ананија: слушај, Ананија, Господ не те пратил, а ти лажна надеж му даваш на овој народ.

¹⁶Затоа, вака вели Господ: еве, Јас ќе те исфрлам од лицето на земјата; уште во текот на оваа година ќе умреш, бидејќи зборуваш против Господ.

¹⁷И умре пророкот Ананија во таа година во седмиот месец.