Read Свето Писмо: Стандардна Библија 2006 (со девтероканонски книги) Еремија 3 Bible Online

Еремија 3 - Свето Писмо: Стандардна Библија 2006 (со девтероканонски книги) bible

Еремија 3

¹Ако мажот си ја остави жената, и таа си замине и стане жена на друг маж, може ли пак да се врати кај него? Нема ли со тоа да се оскверни таа земја? А ти со мнозина милосници блудствуваше, — и при сето тоа ќе се враќаш кај Мене? — вели Господ.

²— Крени ги очите кон идолските светилишта и гледај каде ли не блудствувале со тебе? Како Арапин во пустина седеше ти по патиштата заради нив, и ја осквернуваше земјата со твојот блуд и со твојата грешност.

³Заради тоа беа запрени дождовите и немаше пролетен дожд; но ти имаше чело на блудница, — не сакаше да се засрамиш.

⁴Не викаш ли сега кон Мене: „Оче, Ти беше пријател на младоста моја.“

⁵Зар Тој вечно ќе се лути, ќе пламти ли вечно гневот Негов? Ете, што зборуваш ти, а вршиш зло и продолжуваш така!

⁶Господ ми рече во дните на царот Јошија: виде ли ти, што врши отстапницата, ќерката Израелова? Таа оди на секоја висока гора и под секое лиснато дрво, и таму блудствува.

⁷И откако таа го вршеше сето тоа, Јас мислев дека таа ќе се врати кај Мене, но таа не се врати; и го виде тоа нејзината вероломна сестра Јудеја.

⁸И видов дека, кога заради сите прељубни дејствија на отстапницата, ќерката Израелова, Јас ја напуштив и ѝ дадов разводно писмо, вероломната ѝ сестра Јудеја не се исплаши, туку отиде и сама блудствуваше.

⁹И со јавното блудно дејствување таа ја оскверни земјата, и прељуба вршеше и со камен и со дрво.

¹⁰Но при сето тоа нејзината вероломна сестра Јудеја не се обрати кон Мене од сѐ срце, туку само привидно — рече Господ.

¹¹И ми рече Господ: отстапницата, ќерката Израелова, излезе поправа, отколку вероломната Јудеја.

¹²Оди и разгласи ги тие зборови кон север и кажи: — врати се, отстапнице, ќерко Израелова — вели Господ. Јас нема да го излијам врз вас Мојот гнев; зашто Јас сум милостив, — вели Господ — нема вечно да негодувам.

¹³Признај ја само вината своја: зашто отстапи од Твојот Господ Бог и се одвлечка со туѓинци под секое лиснато дрво, а Мојот глас не го слушаше, вели Господ.

¹⁴Вратете се деца — отстапници, вели Господ, зашто Јас сум ваш Господар и ќе земам од вас по еден од град и по двајца од племе и ќе ве одведам на Сион.

¹⁵И ќе ви дадам според срцето Мое пастири, кои ќе ве пасат со знаење и благоразумност.

¹⁶И кога ќе се размножите и ќе станете многуплодни на земјата, тогаш, вели Господ, нема повеќе да велите: Ковчегот на заветот Господов, ни на ум нема да им дојде, и нема да се сетат за него, ниту ќе доаѓаат кај него, ниту пак повторно ќе го градат.

¹⁷Во тоа време Ерусалим ќе го наречат престол на Господ, и сите народи заради името Господово ќе се соберат во Ерусалим и нема повеќе да постапуваат според тврдоглавоста на своето зло срце.

¹⁸Во тие дни Јудиниот дом ќе дојде при Израеловиот дом, и ќе дојдат заедно од северната земја во земјата што Јас им ја дадов во наследство на предците ваши.

¹⁹И реков Јас: „Како да те поставам меѓу синовите и да ти ја дадам многу саканата земја, најпрекрасното наследство на многуте народи?“ И мислев: „Ти ќе Ме нарекуваш твој Отец и нема да отстапиш од Мене.“

²⁰Но, навистина, како што жена вероломна го изневерува сопругот свој, така вероломно постапивте со Мене вие, доме Израелов, вели Господ.

²¹Нека се чуе глас по идолските светилишта, жален плач на Израеловите синови, затоа што тие скршнаа од својот пат, Го заборавија Господа, нивниот Бог.

²²Вратете се, синови одметници: Јас ќе го излекувам вашето непокорство. — Еве, ние идеме кај Тебе, зашто Ти си Господ, Бог наш.

²³Навистина, напразно се надевавме на ридовите и на многуте гори; навистина, во нашиот Господ Бог е Израеловото спасение!

²⁴Уште од млади години таа гадотија ги уништуваше трудовите на нашите предци, овците и воловите нивни, синовите и ќерките нивни.

²⁵Ние лежиме во својот срам, а нашиот срам нѐ покрива, зашто грешевме пред нашиот Господ Бог, — ние и татковците наши, уште од младите години наши дури до овој ден. — И не го слушавме гласот на Господ, нашиот Бог.