Read Свето Писмо: Стандардна Библија 2006 (со девтероканонски книги) Еремија 39 Bible Online

Еремија 39 - Свето Писмо: Стандардна Библија 2006 (со девтероканонски книги) bible

Еремија 39

¹Во деветтата година на Седекија, царот јудејски, во десеттиот месец, дојде Навуходоносор, царот вавилонски со сета војска своја до Ерусалим и го опседна.

²А во единаесеттата година на Седекија, во четвртиот месец, во деветтиот ден од месецот градот беше преземен.

³И влегоа во него кнезовите на вавилонскиот цар — Нергал-Шарецер, Самгар-Неву, Сарсехим, началник на дворјаните, Нергал-Шарецер, заповедник, и сите други кнезови на вавилонскиот цар и се сместија до средните порти.

⁴Кога Седекија, царот јудејски, и сите воени началници, ги видоа, побегнаа, и во текот на ноќта излегоа од градот преку царската градина, низ портите меѓу двата ѕида и тргнаа по патот кон рамнината.

⁵Но халдејската војска се спушти по нив; го достигнаа Седекија во Ерихонската рамнина; го фатија и го одведоа кај вавилонскиот цар Навуходоносор во Ривла, во земјата Хамат, и го судеше.

⁶И вавилонскиот цар во Ривла ги закла синовите на Седекија пред неговите очи; вавилонскиот цар ги закла и сите велможи јудејски;

⁷а на Седекија му ги извади очите и го окова во окови, за да го одведе во Вавилон.

⁸Домот на царот и домовите на народот Халдејците ги изгореа со оган и ѕидовите ерусалимски ги срушија.

⁹А остатокот од народот, што остана во градот, како и одметниците, кои му се придружија, и другиот народ, Навузардан, началникот на телохранителите, ги пресели во Вавилон.

¹⁰Бедните од народот, пак, кои немаа ништо, Навузардан, началникот на телохранителите, ги остави во јудејската земја и им даде уште тогаш лозја и ниви.

¹¹А за Еремија, Навуходоносор, царот вавилонски, му даде таква заповед на Навузардан, началникот на телохранителите —

¹²„Земи го, грижи се за него, и не прави му ништо лошо, туку постапувај со него онака, како што ќе ти каже тој.“

¹³И прати Навузардан, началникот на телохранителите, и Невушазбан, началник на дворјаните, и Нергал-Шарецер, врховниот заповедник, и сите кнезови на вавилонскиот цар,

¹⁴испратија и го зедоа Еремија од стражарницата и му го доверија на Годолија, синот на Ахикам, синот Сафанов; го изведоа и тој остана да живее меѓу народот.

¹⁵Кога Еремија сѐ уште беше затворен во дворскиот затвор, дојде слово Господово до него:

¹⁶оди, речи му на Авдемелех Етиопјанецот — вака вели Господ Саваот, Бог Израелов: еве, Јас ќе ги исполнам зборовите за овој град на зло, но не на добро, и тие ќе се извршат во оној ден пред очите твои;

¹⁷но тебе ќе те избавам во оној ден, вели Господ, и нема да бидеш предаден во рацете на луѓето, од кои се плашиш.

¹⁸Јас ќе те избавам и ти нема да паднеш од меч, и ќе ти остане животот како плен, бидејќи на Мене се надеваше, вели Господ.