Read Свето Писмо: Стандардна Библија 2006 (со девтероканонски книги) Езекиел 18 Bible Online

Езекиел 18 - Свето Писмо: Стандардна Библија 2006 (со девтероканонски книги) bible

Езекиел 18

¹И дојде слово Господово до мене:

²„Зошто употребувате во израелската земја поговорка, велејќи: ‚татковците јадеа кисело грозје, а на децата забите им фаќаат оскомина?‘

³Жив сум Јас, вели Господ Бог: — во иднина нема да ја кажуваат таа поговорка во Израел.

⁴Зашто, ете, сите души се Мои; како душата на таткото, така и душата на синот се Мои: која душа греши, таа ќе умре.

⁵Ако некој е праведен и одржува закон и правда,

⁶по планините не јаде жртвено и кон идолите на домот Израелов не свртува очи, жената на својот ближен не ја осквернува и до жената своја, кога се чисти од својата нечистотија не се приближува;

⁷никого не присилува, на должникот му го враќа залогот и грабеж не врши, од својот леб му дава на гладниот и голиот го облекува во облека,

⁸под лихва не дава и лихва не зема, ја воздржува раката своја од неправда и извршува праведен суд меѓу човек и човек;

⁹постапува според Моите заповеди и искрено пази на Моите наредби — тогаш тој е праведник, тој секако ќе биде жив, вели Господ Бог.

¹⁰Но, ако му се роди син разбојник, кој пролива крв и врши нешто што и да е слично на тоа,

¹¹кое тој сам никако не го вршел и по планини јаде жртвено, и жената на ближниот ја осквернува,

¹²беден и сиромав угнетува, одзема насила, залог не враќа и кон идолите ги врти очите, тој врши гадотија;

¹³дава под лихва и зема лихва, — па зар ќе биде тој жив? Не, тој нема да биде жив. Кој ги врши сите тие гадни работи, тој бездруго ќе умре, крвта негова ќе биде врз него.

¹⁴Но, ако некому му се роди син, кој, гледајќи ги сите тие гревови на својот татко, какви што ги вршел, па гледа — и не врши слични работи:

¹⁵по планини жртвено не јаде, кон идолите на домот Израелов не свртува очи, жената на својот ближен не ја осквернува

¹⁶и човек не присилува, залог не зема и насила не одзема, од лебот свој му дава на гладен и гол со облека облекува,

¹⁷врз беден рака не крева, награди и лихва не зема, ги исполнува Моите повелби, тој нема да умре заради гревовите на татко си: тој ќе биде жив.

¹⁸А татко му, бидејќи немилосрдно угнетувал, братот го ограбувал, и вршел лоши работи кај народот свој, ете — тој ќе умре поради своето беззаконие.

¹⁹Вие велите: ‚зошто, пак, синот не ја сноси вината на татко си?‘ Затоа, што синот постапува законски и праведно, пази на сите Мои наредби и ги извршува: тој ќе биде жив.

²⁰Душата, која згрешила, ќе умре; синот нема да го понесе гревот на татко си, и таткото нема да го понесе гревот на синот свој, правдата на праведниот кај него си останува и беззаконието на грешникот кај него си останува.

²¹И грешникот, ако се одврати од сите свои гревови, какви што правел, ако ги пази сите Мои уредби и постапува законски и праведно, ќе биде жив, нема да умре.

²²Сите негови престапи, што ги правел, нема да му се спомнуваат; во правдата своја, што ќе ја врши, тој ќе биде жив.

²³Зар Јас сакам смрт за грешникот? вели Господ Бог. Напротив, Јас сакам — тој да се откаже од патиштата свои и да биде жив.

²⁴И праведникот, ако отстапи од својата правда и постапува неправедно, ако ги врши сите оние гадотии, што ги врши грешникот, ќе биде ли жив? Сите негови добри дела, што ги правел, нема да бидат спомнати: поради беззаконието што го вршел и поради гревовите свои, со кои грешел, тој ќе умре.

²⁵Но вие велите: ‚не е исправен патот Господов‘. Послушајте, доме Израелов, зар Мојот пат не е исправен? Зар вашите патишта не се неисправни?

²⁶Ако праведникот отстапува од правдата своја и врши беззаконија и затоа умира, тој умира поради гревот што го направил.

²⁷И грешникот, ако се откаже од беззаконието свое што го вршел, па одржува закон и правда — ќе ја врати душата своја кон живот.

²⁸Зашто тој видел и се откажал од сите свои престапи, какви што направил: ќе биде жив, нема да умре.

²⁹А домот Израелов вели: ‚не е прав патот Господов!‘ Не се ли прави доме Израелов, Моите патишта? Па зар се прави вашите патишта?

³⁰Затоа Јас ќе ви судам вам, доме Израелов, секого според делата негови, вели Господ Бог; покајте се и оттргнете се од вашите престапи, та вашето нечестие да не ви биде вам сопка.

³¹Отфрлете ги од себе сите свои гревови, со кои сте згрешиле, и направете си ново срце и нов дух; и зошто да умирате, доме Израелов?

³²Зашто Јас не сакам никој да умре, вели Господ Бог; но поправете се — и живејте!“