Read Свето Писмо: Стандардна Библија 2006 (со девтероканонски книги) Езекиел 22 Bible Online

Езекиел 22 - Свето Писмо: Стандардна Библија 2006 (со девтероканонски книги) bible

Езекиел 22

¹И дојде слово Господово до мене:

²„А ти, сине човечки, сакаш ли да судиш, да го судиш крвавиот град? Искажи му ги сите негови гадотии.

³И кажи — вака вели Господ Бог: — О, граде, кој проливаш крв среде себе, за да дојде времето твое, и кој си правиш идоли, за да се осквернуваш,

⁴со крвта, што си ја пролеал, се обвинуваш, и со идолите, што си ги направил, се осквернуваш себеси, се приближија деновите твои и достигна времето твое. Затоа ќе те предадам за потсмев на народите, за поруга на сите земји.

⁵Твоите блиски и твоите далечни ќе ти се смеат, зашто го оскверни името свое и се прочу со беззаконијата свои.

⁶Ете, началниците израелски, секој според силите свои, што беа кај тебе, решија крв да пролеваат.

⁷Во тебе татко и мајка хулат, придојден навредуваат среде тебе, и сирак и вдовица измачуваат во тебе,

⁸светињите Мои не ги почитуваш и саботите Мои ги нарушуваш.

⁹Во тебе има клеветници, крв што пролеваат и по планините јадат идолски жртви, среде тебе вршат гадотии.

¹⁰Кај тебе ја откриваат голотијата на татко си, силуваат жени во времето, кога тие се чистат од нечистотиите свои.

¹¹Еден врши осквернување со жената на блискиот свој, друг ја осквернува снаата своја, трет ја напаѓа сестрата своја, ќерката на таткото свој.

¹²Кај тебе се зема поткуп за да се пролива крв; ти земаш лихва и дарови и со сила изнудуваш добра од ближниот свој, а Мене Ме заборави, вели Господ Бог.

¹³И ете, Јас плеснав со рацете за твоето користољубие, што се разоткрива кај тебе, и за крвнината, која се извршува кај тебе.

¹⁴Ќе устои ли твоето срце, ќе бидат ли цврсти рацете твои во деновите, кога ќе дејствувам против тебе? Јас, Господ, велам — и ќе извршам.

¹⁵Ќе те распрснам меѓу народите, ќе те развеам по земјите и ќе ставам крај на твоите гадотии кај тебе.

¹⁶И сам ќе си направиш за да бидеш презрен пред очите на народите, па ќе познаеш дека Јас сум Господ.“

¹⁷И дојде слово Господово до мене:

¹⁸„Сине човечки, домот Израелов стана во мене згура: тие сите се калај, бакар, железо и олово во печка; станаа како згура.

¹⁹Затоа, така вели Господ Бог: ‚Бидејќи сите вие станавте згура, затоа, еве, Јас ќе ве соберам во Ерусалим.

²⁰Како што во печка ги ставаат заедно среброто, бакарот, железото, оловото и калајот, за да раздувуваат врз нив оган и да ги растопат, така во гневот Свој и во јароста Своја ќе ве кутнам, ќе ве ставам и ќе ве растопам.

²¹Ќе ве соберам и ќе дувнам врз вас оган од Мојот гнев и ќе се растопите во него;

²²како среброто што се топи во печката, така ќе се растопите и вие и ќе познаете дека Јас сум Господ, Кој ја излева јароста Своја врз вас.‘“

²³И дојде слово Господово до мене:

²⁴Сине човечки, кажи му: „Ти си земја неисчистена, неполивана со дожд во гневен ден.“

²⁵Пророците нејзини се огласија како лав што рика, кој го раскинува пленот; тие јадат души, одземаат имоти и драгоцености и со тоа го умножуваат бројот на вдовиците.

²⁶Свештениците нејзини го нарушуваат Мојот закон и ги осквернуваат Моите светињи, не одвојуваат свето од несвето и не прават разлика меѓу чисто и нечисто; од саботите Мои ги покриваат очите свои, и Јас сум понизен меѓу нив.

²⁷Кнезовите нејзини се како волци, кои грабаат плен, проливаат крв, погубуваат души за да придобијат корист.

²⁸А пророците нејзини сѐ замачкуваат со кал, гледаат суета и им претскажуваат лага, велејќи: „Така вели Господ Бог“, иако Господ не рекол така.

²⁹А меѓу народот се угнетуваат еден со друг, грабаат и присилуваат беден и сиромав, и неправедно угнетуваат придојден.

³⁰Јас барав кај нив човек, кој ќе ги обнови ѕидините, да застане пред Мене во одбрана на оваа земја да не ја сотрам, но не најдов.

³¹Па затоа, ќе го излеам врз нив Мојот гнев, со огнот на Мојата јарост ќе ги истребам, нивното лошо однесување ќе го свртам на главите нивни, вели Господ Бог.