Read Свето Писмо: Стандардна Библија 2006 (со девтероканонски книги) Езекиел 29 Bible Online

Езекиел 29 - Свето Писмо: Стандардна Библија 2006 (со девтероканонски книги) bible

Езекиел 29

¹Во десеттата година, десеттиот месец, во дванаесеттиот ден од месецот, дојде слово Господово до мене:

²„Сине човечки, сврти го лицето свое кон фараонот, египетскиот цар, и изречи пророштво против него и против целиот Египет.

³Говори и кажи им — вака вели Господ Бог: еве, Јас сум против тебе фараоне, царе египетски, голем змеју, кој лежиш по реките свои и велиш: ‚моја е реката и јас ја создадов за себе.‘

⁴Но Јас ќе ставам јадица во твоите челусти и на твоите лушпи; и ќе те извлечам од реките твои со сета риба на твоите реки, што се залепила на твоите лушпи;

⁵ќе те фрлам во пустината, тебе и сета риба од твоите реки; ти ќе паднеш на откриено поле; нема да те земат и погребат; ќе допуштам да те изедат ѕверовите земни и птиците небески.

⁶И ќе познаат сите жители на Египет дека Јас сум Господ, зашто тие беа на домот Израелов потпорна трска.

⁷И кога се фатија со раката своја за тебе, ти се раскина и рамињата им ги откина; и кога се потпреа на тебе, ти се скрши и им ги изнарани сите нивни бедра.“

⁸Затоа, вака вели Господ Бог: „Еве, Јас ќе испратам против тебе меч и ќе ги истребам кај тебе луѓето и добитокот.

⁹Египетската земја ќе стане пустина и степа; па ќе познаат дека Јас сум Господ. Бидејќи тој вели — моја е реката и јас ја создадов,

¹⁰затоа, еве, Јас сум против твоите реки и египетската земја ќе ја направам пустина над пустините од Мигдол до Сиена, до пределот на Етиопија.

¹¹Нема да оди по неа човечка нога и нога на добиток нема да стапне на неа, и нема да се живее на неа четириесет години.

¹²И ќе ја направам земјата египетска пустина меѓу запустени земји; и градовите нејзини меѓу запустени градови, ќе бидат пусти четириесет години и ќе ги растурам Египќаните меѓу народите и ќе ги распрснам по земјата.

¹³Зашто вака вели Господ Бог: откако ќе изминат четириесет години, Јас ќе ги соберам Египќаните откај народите, каде што ќе бидат растурени.

¹⁴И ќе ги вратам египетските заробеници и ќе ги доведам назад во земјата Патрос, во земјата на нивното потекло и тие таму ќе претставуваат слабо царство.

¹⁵Тоа ќе биде послабо од другите царства и нема веќе да се гордее над народите; ќе ги смалам за да не владеат над народите.

¹⁶И во иднина, тие нема да бидат потпора на домот Израелов, за да го спомнуваат нивното беззаконие, кога се обраќаа кон него; и ќе познаат дека Јас сум Господ Бог.“

¹⁷Во дваесет и седмата година, првиот месец, во првиот ден од месецот, дојде слово Господово до мене:

¹⁸„Сине човечки, Навуходоносор, царот вавилонски, ја истошти војската своја со големи работи кај градот Тир: секоја глава оќелаве и секое рамо беше изнарането; но ни за него, ни за војската немаше награда од Тир за трудот што тој го употреби против него.“

¹⁹Затоа, така вели Господ Бог: „Еве, Јас му ја давам на вавилонскиот цар Навуходоносор земјата египетска, за да го собере богатството нејзино, да изврши грабеж во неа и да однесе сѐ што грабела таа, и тоа ќе биде награда за неговата војска.

²⁰Како награда за работата, која тој ја изврши во него, Јас му ја предавам земјата египетска, зашто тој го вршеше тоа заради Мене, вели Господ Бог.

²¹Во тој ден ќе го вратам рогот на домот Израелов и тебе ќе ти ја отворам устата меѓу нив, па ќе познаат дека Јас сум Господ.“