Read Свето Писмо: Стандардна Библија 2006 (со девтероканонски книги) Езекиел 38 Bible Online

Езекиел 38 - Свето Писмо: Стандардна Библија 2006 (со девтероканонски книги) bible

Езекиел 38

¹И дојде слово Господово до мене:

²„Сине човечки, сврти го лицето свое кон Гог во земјата Магог, кон кнезот на Рош, Мешех и Тувал, изречи пророштво против него.

³И кажи им — вака вели Господ Бог: ‚Еве, Јас сум против тебе, Гог, кнезу на Рош, Мешех и Тувал.

⁴Ќе те вратам и ќе ставам алка на твојата челуст; ќе те изведам тебе и сета твоја војска, коњите и коњаниците, сите храбри јунаци, многубројни борци, во оклопи и со штитови, сите вооружени со мечеви.

⁵Персијците, Етиопјаните и жителите на Пут со нив, сите со штитови и со шлемови.

⁶Гомер со сите чети, домот на Тогарма од северните предели, со сите свои чети, многу народи со тебе.

⁷Готви се и приготви се — ти и сите твои чети собрани кај тебе и биди им водач.

⁸По многу дни ти ќе бидеш посетен; во последните години ќе дојдеш во земја избавена од меч, собрана меѓу многу народи на израелските планини, кои беа долго време запустени, но сега жителите нејзини ќе бидат повратени откај народите, и сите тие ќе живеат спокојно.

⁹Па ќе се кренеш како бура, ќе тргнеш како црн облак за да ја покриеш земјата, ти и сите твои чети и многу народи со тебе.‘“

¹⁰Така вели Господ Бог: „Во оној ден ќе ти дојдат на срцето мисли и ти ќе помислиш да направиш нешто лошо.

¹¹И ќе речеш: ‚ќе се кренам против неоградена земја, ќе појдам против мирните кои живеат безгрижно — сите тие живеат без ѕидови и кај нив нема ни резиња, ни порти,

¹²за да грабаш и да насобереш плен, да ставиш рака врз одново населените урнатини и врз народ собран откај народите, кои се занимаваа со добитокот и имотот свој, кој живее на папокот од земјата.‘

¹³Сева и Дедан и таршишките трговци со сите нивни млади лавови ќе ти речат: ‚Ти дојде да извршиш грабеж, ја собра твојата војска за да земеш плен, да земеш сребро и злато, да одземеш добиток и имот, да заграбиш голем плен.‘“

¹⁴Затоа изречи пророштво, сине човечки, и кажи му на Гог — вака вели Господ Бог: „Па зар не ти е познато дека во оној ден народот Мој Израел ќе заживее во мир?

¹⁵И ќе тргнеш од твоето место, од северните предели, ти и многу народи со тебе, сите на коњи, голем собир и многубројна војска.

¹⁶И ќе се кренеш против Мојот народ, против Израел, како црн облак, за да ја покриеш земјата: тоа сѐ ќе биде во последните дни, и Јас ќе те доведам во Мојата земја, та народите да Ме познаат кога ќе се појавам над тебе, Гог, Мојата светост пред очите нивни.“

¹⁷Така вели Господ Бог: „Не си ли ти оној, за кого зборував во дамнешните дни преку Моите слуги, пророците израелски, кои пророкуваа тогаш дека Јас ќе те доведам против нив?“

¹⁸„Во оној ден, кога ќе дојде Гог против израелската земја, вели Господ Бог, Мојот гнев ќе пламне во Мојата јарост.

¹⁹И во Мојата ревност, во огнот на Моето негодување, Јас реков: навистина во оној ден ќе настане голем потрес во земјата израелска.

²⁰И од лицето Мое ќе затреперат рибите морски и птиците небески, и ѕверовите полски и сѐ што се влече и лази по земјата, и сите луѓе што се наоѓаат на земјата; ќе се соборат планини, ќе попаѓаат карпи и сите ѕидови ќе паднат на земја.

²¹И по сите Мои планини ќе повикам меч против него, вели Господ Бог; мечот на секој човек ќе биде против братот негов.

²²И ќе му судам преку помор и крвопроливање ќе излијам врз него и војските негови и врз многуте народи што се со него, силен дожд и град како камења, оган и сулфур.

²³Ќе го покажам Моето величие и Мојата светост и ќе се појавам пред очите на многу народи — и тие ќе познаат дека Јас сум Господ.“