Read Свето Писмо: Стандардна Библија 2006 (со девтероканонски книги) Езекиел 42 Bible Online

Езекиел 42 - Свето Писмо: Стандардна Библија 2006 (со девтероканонски книги) bible

Езекиел 42

¹И ме изведе од надворешниот двор по северниот пат и ме доведе кај собите, што беа кон рамнината и кон зградата од север,

²до она место, кое кај северната врата е долго сто лакти, а широко педесет лакти.

³Кон дваесетте лакти на внатрешниот двор и спроти плочникот, што е откај надворешниот двор, трем спроти трем на три ката.

⁴А пред собите имаше ходник — десет лакти широк, а внатре по еден лакот; вратите негови беа свртени кон север.

⁵Горните соби беа потесни, зашто тремовите одземаа од нив спротивно на долните соби од зградата, кои беа пошироки.

⁶Собите беа на три ката, а немаше такви столбови какви што имаше во дворовите, затоа тие и се направени потесни, спротивно на долните и средните соби, почнувајќи од подот.

⁷А надворешниот ѕид спрема тие соби од надворешниот двор, кој ја поврзува предната страна на собите, е долг педесет лакти;

⁸зашто и собите на надворешниот двор имаат должина само педесет лакти, и така пред храмот — сто лакти.

⁹А долу имаше ходник кон тие соби од источната страна, кога се доаѓа кај нив од надворешниот двор.

¹⁰По ширината на ѕидот до дворот кон исток пред плоштадот и пред зградата имаше соби.

¹¹А ходникот пред нив беше исто таков како и пред оние соби што се свртени кон север, со иста таква должина како и кај нив, и исто таква ширина; и сите излези нивни и изработката нивна и вратите нивни беа исто такви како и кај другите.

¹²Имаше исти врати какви што беа и кај собите од јужната страна; и за влез во нив имаше врати кај патеката, која водеше надолж по источниот ѕид.

¹³И ми рече тој: северните соби и јужните соби, што се наоѓаат пред плоштадот, се свети соби, во кои свештениците, што Му се приближуваат на Господ, ги јадат најсветите жртви; само таму ги ставаат најсветите жртви и лебниот принос, жртвите за грев и жртвите за престап, зашто тоа е свето место.

¹⁴Кога влегуваат таму свештениците, тие не треба да излезат од тоа свето место во надворешниот двор, сѐ додека таму не ги остават своите облеки, со кои служеле, зашто тие се свештени облеки; треба да облечат други облеки, и тогаш да излезат пред народот.

¹⁵Кога го заврши тој мерењето на внатрешниот храм, ме изведе пред вратите, свртени кон исток, и почна да мери наоколу.

¹⁶Ја измери источната страна со мерната трска, измери со неа — петстотини трски;

¹⁷На северната страна со истата мерна трска измери вкупно петстотини трски.

¹⁸На јужната страна со мерната трска измери исто така петстотини трски.

¹⁹И кога се заврте спрема западната страна со мерната трска, измери исто така петстотини трски.

²⁰Од сите четири страни тој го измери; околу него имаше ѕид долг петстотини трски и петстотини трски широк, за да го одделува светото место од несветото.