Read Свето Писмо: Стандардна Библија 2006 (со девтероканонски книги) Езекиел 45 Bible Online

Езекиел 45 - Свето Писмо: Стандардна Библија 2006 (со девтероканонски книги) bible

Езекиел 45

¹Кога со ждрепка ќе ја делите земјата на делови, одделете свет дел за Господ — дваесет и пет илјади лакти во должина и десет илјади лакти во ширина; тоа место да биде свето како целина наоколу.

²Од него до светилиштето да има четириаголник, по петстотини лакти наоколу и околу него, со ширинка од педесет лакти.

³Според таа мерка измери дваесет и пет илјади трски надолж и десет илјади трски по ширината, каде што ќе се наоѓа светилиштето, Светињата над светињите.

⁴Тој дел од светата земја ќе им припаѓа на свештениците, служители на светилиштето, кои ќе пристапуваат да Му служат на Господ; тоа место ќе биде место за куќи и светиња за светилиштето.

⁵Дваесет и пет илјади трски по должина и десет илјади трски по ширина, ќе им припаѓа на левитите, служители на храмот, како нивно владение, каде што ќе живеат.

⁶Дајте му и на градот владение од пет илјади трски нашир и дваесет и пет илјади трски по должина, спроти светото место, определено за Господ; тоа ќе му припаѓа на сиот дом Израелов.

⁷И за кнезот определете дел од едната и од другата страна, до светото место, определено за Господ, како и до владението на градот, кон запад од западната страна и кон исток од источната страна, во должина еднаква со еден од оние делови од западниот до источниот крај.

⁸Тоа ќе биде негова земја, негово владение во Израел, така што во иднина кнезовите Мои да не го угнетуваат народот Мој, и земјата да ја раздаваат на домот Израелов според колената негови.

⁹Така вели Господ Бог: кнезови израелски, доста беше ова, оставете ги насилствата и принудувањата, а вршете закон и правда; престанете да го изгонувате народот Мој од владенијата негови, вели Господ Бог.

¹⁰Имајте иста мерка: вистинска ефа и вистински бат.

¹¹Ефата и батот треба да бидат еднакви, така што батот да содржи една десетина хомер, а и ефата една десетина хомер; мерката нивна треба да се определува според хомерот.

¹²Во еден шекел треба да се содржат дваесет гери; а дваесет шекели, дваесет и пет шекели и петнаесет шекели треба да ви претставуваат една мина.

¹³Ете, тоа е данокот што ќе му го давате на кнезот: шести дел од ефа по секој хомер пченица и шести дел од ефа по секој хомер јачмен;

¹⁴а мерката за маслото: една десетина бат од секој кор, (корот, како и хомерот изнесува десет бата);

¹⁵по една овца на стадо од двесте овци, од богатото пасиште на Израел; сето тоа ќе биде дар за лебен принос, за сепаленица и за благодарствена жртва, поради нивното очистување, вели Господ Бог.

¹⁶Сиот народ од земјата должен е да го дава тој принос за кнезот во Израел.

¹⁷А кнезот е должен да принесува сепаленици и лебен принос, прелив на празници, во новомесечијата и во саботите за време на сите прослави во домот Израелов; тој ќе треба да принесува жртви за грев и лебен принос, сепаленици и благодарствени жртви за очистување на домот Израелов.

¹⁸Така вели Господ Бог: во првиот месец, на првиот ден од месецот, земи од стадото волови јунец без недостаток и очисти го светилиштето.

¹⁹Свештеникот нека земе крв од таа жртва за грев и со неа нека ги пороси довратниците на храмот и рамнинката на жртвеникот на четирите агли, а и довратниците на внатрешниот двор.

²⁰Тоа исто направи го и во седмиот ден од месецот за оние кои намерно и од незнаење грешат, па така очисти го храмот.

²¹На четиринаесеттиот ден од првиот месец треба да празнуваш Пасха, седмодневен празник кога ќе се јадат бесквасни лебови.

²²Во тој ден кнезот ќе принесе за себе и за сиот народ во земјата жртва — еден јунец за грев.

²³И во тие седум дена на празникот тој ќе Му принесува на Господ сепаленица секој ден, по седум јунци и по седум овни без недостаток, а и жртва за грев секој ден — по еден козел од стадото кози.

²⁴Лебен принос ќе принесува по ефа на јунец и по ефа на овен, и масло по хин од ефа.

²⁵Во седмиот месец, на петнаесеттиот ден од месецот, на празникот, во текот на седумте дена тој треба да принесува исто таква жртва за грев, таква сепаленица, и толку лебен принос и толку масло.