Read Свето Писмо: Стандардна Библија 2006 (со девтероканонски книги) Даниел 1 Bible Online

Даниел 1 - Свето Писмо: Стандардна Библија 2006 (со девтероканонски книги) bible

Даниел 1

¹Во третата година од царувањето на јудејскиот цар Јоаким се крена вавилонскиот цар Навуходоносор против Ерусалим и го опседна.

²И го предаде Господ во раката негова јудејскиот цар Јоаким и дел од садовите на домот Божји, и тој ги испрати во земјата Сенаар [1], во домот на неговиот бог, и ги внесоа тие садови во ризницата на неговиот бог.

³И му рече царот на Ашпеназ, началникот на дворјаните, да му доведе од синовите Израелови, од царски и кнежевски род,

⁴момчиња кои немаа никаков телесен недостаток, лични за гледање и способни за секаква наука, добро воспитани, бистри, што ќе одговараат за служење во царските палати, и да ги научи халдејски јазик.

⁵И определи царот секојдневна храна од царската трпеза и вино што сам го пиеше, па заповеда да ги одгледуваат три години, а потоа да се појават пред царот.

⁶Меѓу нив беа од Јудините синови Даниел, Ананија, Мисаил и Азарија.

⁷Тогаш началникот на дворјаните им ги смени имињата: Даниел го нарече Валтазар, Ананија — Седрах, Мисаил — Мисах и Азарија — Авденаго.

⁸Даниел науми да не се осквернува со јадењето од царската трпеза и од виното што го пиеше царот, па затоа го замоли началникот на дворјаните да не го принудува да се осквернува.

⁹Бог му даде на Даниел милост и благонаклоност кај началникот на дворјаните.

¹⁰И така, началникот на дворјаните му рече на Даниел: „Се плашам од својот господар, царот, кој лично ја определи храната и пиењето; ако ги види вашите лица послаби, отколку што се кај момчињата, вашите врсници, вие ќе го доведете во опасност мојот живот пред царот.“

¹¹Тогаш Даниел му рече на чуварот, кого го беше поставил над Даниел, Ананија, Мисаил и Азарија началникот на дворјаните:

¹²„Обиди се со слугите свои — десет дни нека ни даваат зеленчук како храна и вода како пиење;

¹³а потоа нека се јават пред тебе нашите лица и лицата на оние момчиња што се хранат од царската трпеза, па потоа постапувај со слугите свои, како што ќе мислиш да е добро.“

¹⁴Тој ги послуша во тоа и направи таков обид со нив десет дена.

¹⁵По десетте дена лицата нивни изгледаа поубави, а и телесно беа пополни од сите оние момчиња, што се хранеа со царските јадења.

¹⁶Оттогаш чуварот им даваше зеленчук, наместо царската храна.

¹⁷И им дарува Бог на четирите момчиња знаење и разбирање на секаква книга и мудрост, а на Даниел му подари уште да толкува и секакви виденија и соништа.

¹⁸Откако завршија деновите, кога царот беше заповедал да ги претстават, началникот на дворјаните ги претстави пред Навуходоносор.

¹⁹Царот зборуваше со нив и од сите момчиња не се најде ниту едно како што беа Даниел, Ананија, Мисаил и Азарија, и потоа тие почнаа да служат пред царот.

²⁰И во сѐ, за што се бараше мудрост и разбирање, и за што и да ги прашаше царот, ги најде за десетпати подобри од сите гатачи и гледачи, колку што ги имаше во целото негово царство.

²¹И остана таму Даниел до првата година на царот Кир.