Read Свето Писмо: Стандардна Библија 2006 (со девтероканонски книги) Осија 11 Bible Online

Осија 11 - Свето Писмо: Стандардна Библија 2006 (со девтероканонски книги) bible

Осија 11

¹Кога Израел беше млад, Јас го сакав и од Египет го повикав како Мој син.

²Но колку повеќе ги повикував, толку повеќе се оддалечуваа од Мене, принесуваа жртви на Вааловци и им кадеа на идоли.

³Јас Самиот го учев Ефрем да оди, го носев на рацете Свои, а тие не сфаќаа дека се грижев за нив.

⁴Ги привлекував со нежност и со љубов, и Јас бев за нив како оној, што ја олабавува уздата од устата нивна, и кротко им подавав храна.

⁵Тие ќе се вратат во Египет; Ашур — ќе му биде цар, зашто тие не посакаа да се вратат кај Мене.

⁶И меч ќе беснее по нивниот град, ќе ги уништи неговите заштитници, и ќе ги проголта поради нивните сплетки.

⁷Народот Мој е наклонет кон отстапување од Мене. Кон Севишниот повикуваат, но никој не им помага.

⁸Како да те дадам, Ефреме? Како да те предадам, Израеле? Како да те направам како Адма? Да ти направам како што му направив на Цевоим? Срцето Ми се вознемирува, затреперува утробата Моја од жалост.

⁹Нема да постапам според јароста на гневот Свој, и нема да го истребам Ефрем, зашто Јас сум Бог, а не човек, Светец меѓу вас; Јас нема веќе во гнев да доаѓам.

¹⁰По Господа тие ќе одат. Како лав ќе го издигне Тој гласот Свој, ќе го пушти гласот Свој — и ќе побрзаат кон Него синовите од запад,

¹¹ќе полетаат од Египет како птици, и од Асирија — како гулаби, и ќе ги населам во домовите нивни, вели Господ.