Read Свето Писмо: Стандардна Библија 2006 (со девтероканонски книги) Амос 3 Bible Online

Амос 3 - Свето Писмо: Стандардна Библија 2006 (со девтероканонски книги) bible

Амос 3

¹Чујте го овој збор, што го кажа Господ против вас, синови на Израел, против целото племе, кое го изведов од земјата египетска, велејќи:

²само вас ве признав од сите земни племиња, поради тоа и ќе ве казнам поради сите ваши беззаконија.

³Тргнуваат ли двајца заедно, ако не се договорат меѓу себе?

⁴Рика ли лав во гора, кога нема пред него плен? Пушта ли глас лавче од својата пештера, ако ништо не уловило во неа?

⁵Паѓа ли птица во мрежа на земја, кога нема мрежа за неа? Ќе се подигне ли од земјата стапица, ако не се фати ништо во неа?

⁶Труби ли труба во град, а народот да не се уплаши? Се случува ли во градот зло, што не го дозволил Господ?

⁷Зашто Господ Бог не прави ништо додека не им ја открие тајната Своја на Своите слуги — пророците.

⁸Кога ќе зарика лав, кој нема да се исплаши? Господ Бог зборува — кој нема да пророкува?

⁹Прогласете од тврдините на Ашдод и од покривите на земјата египетска и кажете: соберете се по горите на Самарија и погледајте го големото бесчестие во неа и насилствата во неа.

¹⁰Тие не знаат да постапуваат справедливо, вели Господ: со насилие и грабеж собираат добра во дворците свои.

¹¹Затоа, вака вели Господ Бог: еве, непријателот ќе ја опколи земјата, одбраната ќе ти ја разбие и дворците твои ќе бидат ограбени.

¹²Така вели Господ — како што понекогаш пастирот истргнува од лавовска уста две нозе или дел од увото, така ќе бидат спасени синовите Израелови, кои сега седат во Самарија во аголот на постелата своја и во Дамаск на леглото свое.

¹³Слушајте и бидете сведоци против домот на Јаков, вели Господ Бог Саваот.

¹⁴Зашто во оној ден, кога ќе го казнам Израел за престапите негови, ќе го казнам и за жртвениците во Ветил; ќе бидат отсечени роговите на жртвеникот и тие ќе паднат на земја.

¹⁵Ќе го поразам зимскиот дом заедно со летниот дом, и ќе исчезнат домовите со украси од слонова коска, ќе снема многу домови, вели Господ.