Read Свето Писмо: Стандардна Библија 2006 (со девтероканонски книги) Јона 2 Bible Online

Јона 2 - Свето Писмо: Стандардна Библија 2006 (со девтероканонски книги) bible

Јона 2

¹И ѝ заповеда Господ на една голема риба да го проголта Јона; и Јона остана во утробата на тој кит три дена и три ноќи.

²Му се помоли Јона на својот Господ Бог од утробата на рибата,

³па рече: „Кон Господ повикав во мојата неволја и Тој ме чу; извикав од утробата на пеколот — и Ти го чу гласот мој.

⁴Ти ме фрли во длабините, во срцето на морето, и вода ме опколуваше, и сите води Твои и бранови Твои минуваа преку мене.

⁵Тогаш реков: Отфрлен сум од очите Твои, како ќе ја видам светињата Твоја?

⁶Ме притиснаа водите до гушата моја, бездната ме затвори; со трева морска главата моја е обвиена.

⁷Слегнав до корените на планините, земјата со резињата свои за навек ме затвори, но Ти, Господи, Боже мој, ја изведе душата моја од јамата.

⁸Кога животот ми згаснуваше, се сетив на Господ, и молитвата моја стигна до Тебе, до светиот храм Твој.

⁹Оние, кои почитуваат лажни богови, Го оставија својот Милосрден,

¹⁰но јас со благодарствена песна ќе Ти принесам жртва; она што сум го ветил, ќе го исполнам. Во Господ е спасението!“

¹¹Тогаш ѝ заповеда Господ на рибата, и таа го исфрли Јона на копното.