Read Свето Писмо: Стандардна Библија 2006 (со девтероканонски книги) Броеви 10 Bible Online

Броеви 10 - Свето Писмо: Стандардна Библија 2006 (со девтероканонски книги) bible

Броеви 10

¹И му рече Господ на Мојсеј, велејќи:

²„Направи си две сребрени труби, ковани направи ги, за да ти служат да го собираш народот и да ги креваш логорите.

³А кога ќе затрубат со нив, да се собере кај тебе целото општество пред влезот од скинијата на собранието.

⁴Кога ќе се затруби со едната труба, да дојдат кај тебе кнезовите и војводите израелски.

⁵Кога ќе затрубите за поаѓање, да се кренат оние логори што се сместени кон исток.

⁶Кога ќе затрубите по вторпат за поаѓање, тогаш да се кренат логорите што се сместени кон југ; вака да се труби кога се тргнува на пат.

⁷Кога, пак, се свикува собранието, трубете, но не на тој начин.

⁸Со трубите да трубат Ароновите синови, свештениците: тоа да ви биде вечен закон во родовите ваши.

⁹И кога ќе се кренете да ја браните земјата ваша од непријателот, кој оди против вас, трубете со трубите, и Господ, Бог ваш, ќе си спомни за вас, и вие ќе се избавите од непријателите ваши.

¹⁰И во деновите кога ќе се веселите, и на празниците ваши, и на новомесечијата ваши трубете со труби кога принесувате сепаленица, или жртва за мир; тоа ќе биде за вас сеќавање пред вашиот Бог: Јас сум Господ, Бог ваш.“

¹¹На втората година, во вториот месец, на дваесеттиот ден од месецот, облакот се крена од скинијата на собранието.

¹²Тогаш синовите израелски појдоа од Синајската Пустина табор по табор, и облакот застана во пустината Фаран.

¹³И се кренаа тие за првпат, по заповед на Господ, дадена преку Мојсеј.

¹⁴Прво беше кренато знамето што беше во логорот на потомците Јудини, според полковите нивни; со војската Јудина раководеше Наасон, Аминадавовиот син;

¹⁵со војската од племето на потомците Исахарови раководеше Натанаил, Цуаровиот син;

¹⁶над војската од племето на потомците Завулонови беше Елијав, Хелоновиот син.

¹⁷И се кренаа синовите Гирсонови и синовите Мерариеви, кои ја носеа скинијата.

¹⁸Потоа беше кренато знамето во логорот на потомците Рувимови според полковите нивни; и над војската Рувимова беше Елицур, Шедеуровиот син;

¹⁹а над војската од племето на потомците Симеонови беше Шелумиел, Цуришадаевиот син;

²⁰над војската, пак, од племето на потомците Гадови беше Елијасаф, Деуелов син.

²¹Потоа тргнаа Каатовците, носејќи го светилиштето; а скинијата ја поставуваа пред тие да пристигнат.

²²И се крена знамето во логорот на потомците Ефремови со војската негова; и над војската Ефремова беше Елишама, Амиудовиот син;

²³а над војската од племето на потомците Манасиеви беше Гамалиил, Педацуровиот син;

²⁴над војската пак, од племето на потомците Венијаминови беше Авидан, Гидониевиот син.

²⁵Последно меѓу сите логори беше кренато знамето во таборот на потомците Данови со војската нивна; и над војската Данова беше Ахиезер, Амишадаевиот син;

²⁶а над војската од племето на потомците Асирови беше Пагиил, Охрановиот син.

²⁷Над војската пак, од племето на потомците Нефталимови беше Ахира, Енановиот син.

²⁸Тоа е редоследот на тргнувањето на синовите израелски со војските нивни. И тргнаа.

²⁹И му рече Мојсеј на Ховав, синот на Рагуил, Мидјанецот, Мојсеевиот тест: „Ние одиме во она место, за кое Господ рече: ‚вам ќе ви го дадам.‘ Дојди со нас, ќе ти направиме добро, зашто Господ вети многу добрини за Израел.“

³⁰Но тој му одговори: „Нема да дојдам; ќе отидам во својата земја, при родот свој.“

³¹А Мојсеј му рече: „Не оставај нѐ, зашто ти ги знаеш местата во пустината, и ќе ни бидеш како предводник.

³²Ако појдеш со нас, оние добра што Господ нам ќе ни ги направи, ќе ти ги направиме и ние тебе.“

³³И изминаа од планината Господова три дена пат, а ковчегот на заветот Господов одеше пред нив на три дена пат, за да им одбере место, каде да се сместат.

³⁴И облакот Господов ги осенуваше дење, кога тргнуваа од логорот.

³⁵Кога ковчегот се креваше за пат, Мојсеј велеше: „Стани, Господи, и ќе ги снема Твоите непријатели, и ќе избегаат од Твоето лице оние што Те мразат!“

³⁶А кога ковчегот се запираше, тој велеше: „Врати се, Господи, кај илјадите и десетиците илјади Израелци!“