Read Свето Писмо: Стандардна Библија 2006 (со девтероканонски книги) Броеви 15 Bible Online

Броеви 15 - Свето Писмо: Стандардна Библија 2006 (со девтероканонски книги) bible

Броеви 15

²„Кажи им на синовите израелски и речи им: кога ќе влезете во земјата, во која ќе живеете и која ви ја давам,

³и почнете да принесувате на Господ жртви сепаленици, или жртви заклани, поради завет, или од сесрдност, или во текот на празниците ваши, за да направите пријатен мирис пред Господ, од крупниот или од ситниот добиток,

⁴тогаш оној, кој ја принесува жртвата на Господ, треба да принесе и лебен принос на Господ од една десетина ефа пченично брашно, измешано со четврт ин маслиново масло;

⁵и вино за прелив принесувај по четврт ин за сепаленица, како и за друга жртва, ако таа жртва е едно јагне.

⁶И овен кога принесувате, принесувајте и лебен принос две десетини од ефа пченично брашно, измешано со една третина ин маслиново масло;

⁷и вино за прелив принеси една третина ин за благопријатен мирис пред Господ.

⁸Ако принесувате сепаленица од говедата, или колена жртва, поради завет или како жртва за мир,

⁹тогаш заедно со јунецот принесете и лебен принос три десетини од ефа пченично брашно, измешано со половина ин маслиново масло,

¹⁰и вино за прелив принесете половина ин како жртва, за благопријатен мирис пред Господ.

¹¹Така прави при секој принос на јунец, на овен, и на јагне или јаре;

¹²според бројот на жртвите што ги принесувате, така правете при секоја од нив, според бројот нивни.

¹³Секој тукашен така треба да прави, кога принесува жртва за благопријатен мирис пред Господ;

¹⁴и кога меѓу вас има придојден или кој и да било меѓу вас во поколенијата ваши, и принесе жртва за благопријатен мирис пред Господ, и тој треба да прави така, како што правите вие;

¹⁵за вас, народот Господов, и за придојдениот, кој живее меѓу вас, законот да биде еден, вечниот закон во родовите ваши: што сте вие, тоа да биде и придојдениот пред Господ;

¹⁶еден закон и еднакви права да има, и за вас, и за придојдениот, кој живее меѓу вас.“

¹⁷Му рече уште Господ на Мојсеј, велејќи:

¹⁸„Кажи им на синовите израелски и речи им: кога ќе влезете во земјата, во која ве водам,

¹⁹и ќе почнете да јадете леб од таа земја, оставете и дел за Господ;

²⁰од првините на тестото принесете; леб принесете од гумното.

²¹Од првината на тестото ваше принос принесувајте Му на Господ во родовите ваши.“

²²„Ако погрешите поради незнаење и не ги исполните сите тие заповеди, кои Господ му ги кажа на Мојсеј,

²³сѐ она што ви заповеда Господ преку Мојсеј, од денот, кога Господ ви заповедал, и за во иднината во родовите ваши,

²⁴ако грешката е направена неволно од народот, тогаш целото општество нека принесе еден јунец за сепаленица, за благопријатен мирис на Господ, заедно со лебен принос и прелив, според прописите, и еден козел — жртва за грев.

²⁵И свештеникот ќе го ослободи од грев целото општество на синовите израелски, и ќе им се прости, зашто тоа било грешка, и тие принеле свој дар на Господ и жртва за грев пред Господ, поради своето незнаење.

²⁶И ќе му биде простено на целото општество на синовите израелски и на придојдениот, кој живее меѓу нив, зашто целиот народ го направил тоа поради незнаење.

²⁷Ако некој сам згреши не сакајќи, нека принесе едногодишна коза заради својот грев.

²⁸И свештеникот ќе ја ослободи од грев таа душа, која не сакајќи направила пред Господ грев, и таа ќе биде очистена и ќе ѝ биде простено.

²⁹Еден закон да биде за сите вас, како за жителите од синовите израелски, така и за придојдениот, кој живее меѓу вас, кога некој ќе погреши несакајќи.

³⁰Ако некој од тукашните или од придојдените изврши нешто со дрскост, тој Го хули Господа; да се истреби таа душа од народот свој;

³¹зашто тој го презрел зборот на Господ и ја нарушил заповедта Негова; да биде истребена таа душа; гревот нејзин да биде врз неа.“

³²Кога синовите израелски беа во пустината, најдоа еден, како собира дрва во саботен ден;

³³и оние што го најдоа, како собира дрва, го приведоа кај Мојсеј и Арон и кај целото општество;

³⁴и го затворија, бидејќи уште не беше решено што да се прави со него.

³⁵И му рече Господ на Мојсеј: „Тој човек треба да умре; целото општество да го убие со камења надвор од населбата.“

³⁶Тогаш целото општество го изведе надвор од населбата, и го убија со камења, и тој умре, како што му заповеда Господ на Мојсеј.

³⁷И му рече Господ на Мојсеј, велејќи:

³⁸„Објави им на синовите израелски и кажи им да си прават реси по полите на своите облеки во поколенијата свои, и во ресите што се по полите, да ставаат нишки од сина преѓа,

³⁹и тие да ви бидат на ресите, па, кога ги гледате, да се потсетувате на сите заповеди Господови и да ги извршувате и да не се поведувате по срцето свое и очите ваши, кои ве водат во заблуда.

⁴⁰Да ги помните и извршувате сите Мои заповеди и да бидете свети пред вашиот Бог.

⁴¹Јас сум Господ, Бог ваш, Кој ве изведе од египетската земја, за да ви бидам Бог. Јас сум Господ, Бог ваш.“