Read Свето Писмо: Стандардна Библија 2006 (со девтероканонски книги) Броеви 27 Bible Online

Броеви 27 - Свето Писмо: Стандардна Библија 2006 (со девтероканонски книги) bible

Броеви 27

¹И дојдоа ќерките на Салпаад, син на Хефер, кој беше син на Галаад, а тој — син на Махир, од поколението на Манасија, син Јосифов; и еве ги имињата на ќерките негови: Махла, Ноа, Хогла, Милка и Тирца;

²и откако застанаа пред Мојсеј, пред свештеникот Елеазар, пред кнезовите и пред целото општество, при влезот од скинијата на собранието, рекоа:

³„Таткото наш умре во пустината, и тој не беше меѓу соучесниците што станаа против Господ заедно со луѓето на Кореј, туку умре поради свој грев, без синови.

⁴Зошто да се загуби името на таткото наш меѓу племето негово поради тоа што нема син? Дајте ни дел меѓу браќата на таткото наш!“

⁵И Мојсеј го изнесе прашањето нивно пред Господ.

⁶А Господ му рече на Мојсеј:

⁷„Право велат Салпаадовите ќерки; дај им наследствен дел меѓу браќата на таткото нивни и предај им го ним делот на нивниот татко,

⁸а на синовите на Израел јави им и кажи: ако некој умре, и не остави син, предавајте го наследството негово на ќерките негови;

⁹ако, пак, тој нема ќерки, давајте го неговиот дел на браќата негови;

¹⁰ако нема браќа, дајте го неговиот дел на стриковците негови;

¹¹ако, пак, нема ни стриковци, дајте му го неговиот дел на најблискиот негов роднина од неговиот род; и нека биде тоа закон за синовите израелски, како што му заповедал Господ на Мојсеј!“

¹²И му рече Господ на Мојсеј: „Излези на планината Аварим и погледај ја земјата што им ја давам на синовите израелски;

¹³и откако ќе ја погледаш, прибери се и ти при народот свој, како што се прибра Арон, братот твој;

¹⁴зашто вие не ја послушавте заповедта Моја во пустината Син, кога меѓу општеството се појави расправија, да ја покажете пред очите нивни Мојата светост при водата. Тоа е водата Мерива кај Кадис, во пустината Син.“

¹⁵И Му рече Мојсеј на Господ, велејќи:

¹⁶„Господ, Бог на духовите во сите тела, нека одреди над овој народ човек,

¹⁷кој ќе ги управува, и кој ќе ги предводи во сите можни околности, та да не остане народот Господов како стадо без пастир.“

¹⁸И му рече Господ на Мојсеј: „Земи го Исус, Навиновиот син, човек, во кого има Дух, и положи ја врз него раката своја.

¹⁹Претстави го пред свештеникот Елеазар и пред целото општество, и дај му наредби пред целиот народ,

²⁰и дај му од славата твоја за да го слуша сиот народ на синовите израелски;

²¹а тој да се обраќа до свештеникот Елеазар и да се допрашува до него за решенија преку урим пред Господ; и според зборот негов секогаш да постапуваат: тој и сите синови на Израел со него, и целото општество.“

²²И направи Мојсеј како што му заповеда Господ Бог, и го зеде Исуса, па го претстави пред свештеникот Елеазар и пред целото општество;

²³и ги положи врз него рацете свои и му даде совет, како што заповеда Господ преку Мојсеј.