Read Свето Писмо: Стандардна Библија 2006 (со девтероканонски книги) Броеви 34 Bible Online

Броеви 34 - Свето Писмо: Стандардна Библија 2006 (со девтероканонски книги) bible

Броеви 34

¹Му рече Господ на Мојсеј, велејќи:

²„Заповедај им на синовите на Израел и кажи им: кога ќе влезете во хананската земја, таа е земјата, која ќе ви се падне во дел — земјата хананска со пределите нејзини:

³вашата јужна граница ќе започнува од пустината Син, покрај Едом; ќе започнува од крајот на Соленото Море откај исток;

⁴потоа вашата граница ќе сврти на југ кон Акравимските возвишенија, минува низ Син, ќе дојде јужно од Кадис-Барнеа, па потоа ќе продолжи кон Хацар-Адар и Ацмон;

⁵од Ацмон границата ќе оди кон египетската река и ќе излегува на морето.

⁶А западна граница ќе ви биде Големото Море. Тоа ќе ви биде граница откај запад.

⁷Откај север, пак, да имате граница: од Големото Море да оди кон планината Ор,

⁸од планината Ор да продолжува до Емат, и оттука да свртува кон Цедад;

⁹оттаму границата да продолжи кон Зифрон и да скршнува кон Хацар-Енан: тоа да ви биде северната граница.

¹⁰Источната граница означете ја сами од Хацар-Енан до Шефам,

¹¹од Шефам ќе продолжи кон Ривла, потоа, слегувајќи уште надолу, се допира до источните брегови на Генисаретското Езеро; од источната страна на Ајин;

¹²потоа границата ќе оди по реката Јордан и ќе заврши кај Соленото Море. Тоа да ви биде земјата со границите нејзини наоколу.“

¹³Тогаш им заповеда Мојсеј на синовите на Израел и им рече: „Еве ја земјата што ќе ја поделите со ждрепка, која Господ заповеда да им се даде на деветте племиња и на половината од племето,

¹⁴зашто племето на Рувимовите потомци според семејствата нивни, и племето на потомците на Гад според семејствата нивни, и половината од Манасиевото племе, го добија својот дел:

¹⁵двете племиња и половината племе го добија својот дел со ждрепка од оваа страна на Јордан, спроти Ерихон, на исток.“

¹⁶И му рече Господ на Мојсеј, велејќи:

¹⁷„Ова се имињата на мажите што ќе ја поделат таа земја меѓу вас: свештеникот Елеазар, и Исус, Навиновиот син;

¹⁸а за делењето на земјата земете и по еден кнез од секое племе.

¹⁹А еве ги имињата на тие мажи: за Јудиното племе — Халев, синот Јефунеов;

²⁰за племето на Симеоновите потомци — Самоил, синот Амиудов;

²¹за Венијаминовото племе — Елидад, синот Кислонов;

²²за племето на Дановите потомци — кнезот Буки, Јоглиевиот син;

²³за Јосифовите потомци, за племето на Манасиевите потомци — кнезот Ханиил, Ефодовиот син;

²⁴за коленото на Ефремовите потомци — кнезот Кемуел, синот Шифтанов;

²⁵за племето на Завулоновите потомци — кнезот Елицафан, синот Парнахов;

²⁶за племето на Исахаровите потомци — кнезот Палтиел, синот Азанов;

²⁷за племето на Асировите потомци — кнезот Ахиуд, синот Шеломиев;

²⁸за племето на Нефталимовите потомци — кнезот Педаел, синот Амиудов.“

²⁹Тоа се оние, на кои Господ им заповеда да ги поделат деловите меѓу синовите на Израел во хананската земја.