Read Свето Писмо: Стандардна Библија 2006 (со девтероканонски книги) Броеви 36 Bible Online

Броеви 36 - Свето Писмо: Стандардна Библија 2006 (со девтероканонски книги) bible

Броеви 36

¹Дојдоа старешините на семејствата од родовите на синовите на Галаад, потомци на Махир, син Манасиев, од племињата на Јосифовиот народ, и говореа пред Мојсеј и пред кнезовите, старешини од родовите на синовите израелски,

²па рекоа: „Господ му заповеда на господарот наш да им дадеме земја во дел на синовите израелски со ждрепка, и на господарот наш му е заповедано од Господ, делот на Салпаад, наш брат, да им го дадеме на ќерките негови;

³ако, пак, тие се омажат за синови од некое друго израелско племе, тогаш нивниот дел ќе се одземе од делот на татковците наши и ќе се додаде кон делот на она племе, во кое тие ќе бидат омажени; и така ќе се одземе наследството нивно од делот, кој ни се падна со ждрепка нам;

⁴а кога кај синовите на Израел ќе има јубилејна година, делот нивни ќе се додаде кон делот на она племе, во кое тие ќе бидат омажени — делот нивни ќе се одземе од делот на татковото ни племе.“

⁵Тогаш Мојсеј им заповеда на синовите на Израел, според повелбата Господова, и рече: „Право говори племето на Јосифовите потомци:

⁶еве, како заповеда Господ за Салпаадовите ќерки: тие можат да бидат жени на оние што ќе им се допаднат, но можат да се омажат само со човек од племето од татковиот им род,

⁷за да не минува делот на синовите израелски од едно племе во друго — зашто секој од синовите на Израел треба да биде приврзан кон делот од племето на неговите предци;

⁸и секоја ќерка, која наследува дел во племето на синовите израелски, треба да стане жена на некого од племето на татковиот си род, та секој од синовите на Израел да го наследува делот на своите предци;

⁹и да не минува делот од едно племе во друго; туку секое израелско племе ќе остане приврзано кон делот од племето на неговите предци.“

¹⁰Како што му заповеда Господ на Мојсеј, така и направија Салпаадовите ќерки.

¹¹Затоа Салпаадовите ќерки Махла, Тирца, Хогла, Милка и Ноа се омажија со синовите од своите стриковци;

¹²тие се омажија во племето од потомците на Манасија, Јосифов син, и нивниот дел остана во племето на нивниот татко.

¹³Тоа се заповедите што Господ им ги даде на синовите израелски преку Мојсеј во Рамнините Моавски, кај Јордан, спроти Ерихон.