Read Свето Писмо: Стандардна Библија 2006 (со девтероканонски книги) Броеви 4 Bible Online

Броеви 4 - Свето Писмо: Стандардна Библија 2006 (со девтероканонски книги) bible

Броеви 4

¹И им рече Господ на Мојсеј и на Арон, велејќи:

²„Пребројте ги Каатовите синови меѓу синовите Левиеви според родовите нивни и според семејствата нивни,

³од триесет години и нагоре до педесет години, способни за служба, за да ги вршат сите работи во скинијата на собранието.

⁴А ова е службата на Каатовите синови во скинијата на собранието: да ја носат Најсветата Светиња.

⁵Кога ќе треба да се крене на пат, Арон и синовите негови да влезат и да ја симнат покривната завеса и да го покријат со неа ковчегот на заветот

⁶и да го покријат со покровот од скапоцени кожи, и над него да ја стават покривката цела од синкаво ленено платно, и да ги постават носилата.

⁷И трпезата за приносните лебови да ја покријат со синкаво ленено платно и да ги наредат одозгора чиниите, и лажиците, и чашите, и потирите; а на неа секогаш да има лебови;

⁸да стават врз нив црвена покривка, да ја покријат со покривало од скапоцена кожа и да ѝ ги постават лостовите за носење.

⁹Да земат исто така сина покривка, и да го покријат свеќникот за осветлување, и кандилцата негови, и подлошките негови, и сите садови за масло, со кои се служат,

¹⁰да го обвијат него и сите негови прибори со покривка од скапоцени кожи и да го стават на неговата носилка.

¹¹А на златниот жртвеник да стават покривка од синкаво платно, да го покријат со покривка од скапоцени кожи, и да ги постават неговите лостови за носење.

¹²Да го земат сиот прибор за служење, со кој служат во светилиштето, да го обвијат во синкаво платно, да го покријат со покривка од скапоцени кожи, и да го постават на неговата носилка.

¹³Да го очистат жртвеникот од пепелта и да го обвијат со пурпурно платно;

¹⁴да го стават одозгора сиот прибор негов, со кој се служат при него — мангалите, виљушките, лопатките и чашите — сиот прибор на жртвеникот, и да го покријат со покривка од скапоцени кожи и да го постават на неговите лостови за носење.

¹⁵И кога ќе направат така, Арон и синовите негови, покривајќи го целото светилиште и сите негови работи, па кога ќе се крева населбата, тогаш Каатовите синови да влезат и да носат; но тие не смеат да се допираат до светите работи, за да не умрат. Тие работи од скинијата на собранието да ги носат Каатовите синови.

¹⁶На Елеазар, синот на свештеникот Арон, му се доверува маслото за светилникот, благомиризливата смеса за кадење, постојаниот лебен принос и маслото за помазание — му се доверува целата скинија и сѐ што е во неа, светилиштето и она што му припаѓа нему.“

¹⁷И им рече Господ на Мојсеј и на Арон, велејќи:

¹⁸„Не погубувајте го родот на Каатовците меѓу левитите,

¹⁹туку еве што ќе направите за нив, за да бидат живи и да не умрат, кога ќе пристапат кон Светињата над светињите: Арон и синовите негови нека дојдат и нека му определат на секого од нив кој што ќе работи и што ќе носи:

²⁰но тие не смеат да се доближуваат и да ја видат светињата кога ја покриваат, за да не умрат.“

²¹И му рече Господ на Мојсеј, велејќи:

²²„Преброј ги и Гирсоновите синови според семејствата нивни и според родовите нивни,

²³од триесет години нагоре до педесет години, пребројте ги сите способни за служба и за работа во скинијата на собранието.

²⁴Еве ја работата на Гирсоновиот род, кога ќе служат и кога ќе носат:

²⁵да ги носат платништата на скинијата, и скинијата на собранието со покривот нејзин, и покривката од скапоцени кожи што е на неа, и завесата од влезот во скинијата на собранието,

²⁶платништата околу дворот и завесата од влезот во дворот што се околу скинијата и жртвеникот, со јажињата и другите нивни принадлежности; и сѐ околу ова што треба да се работи, нека го работат.

²⁷Сите служби на Гирсоновите синови, кога носат товари и кога вршат работа, треба да се извршуваат по заповед на Арон и на синовите негови; ним доверете им го и чувањето на она што ќе го носат.

²⁸Тоа се службите на родовите на Гирсоновите синови во скинијата на собранието и тоа е она што треба да го чуваат под надзор на Итамар, синот на свештеникот Арон.

²⁹Преброј ги Мерариевите синови според родовите нивни и според семејствата нивни;

³⁰од триесет години нагоре до педесет години, преброј ги сите способни за служба, за да работат во скинијата на собранието.

³¹Еве што треба да носат тие според службата своја во скинијата на собранието: штиците од скинијата и напречните греди нејзини, столбовите нејзини и подножјата нивни,

³²и столбовите од сите страни на дворот и подножјата нивни, и клиновите нивни и јажињата нивни, и сиот прибор што им припаѓа; и именувајте ги работите што треба да ги носат.

³³Тоа е работата на родовите на Мерариевите синови според службата нивна при скинијата на собранието, а под надзор на Итамар, синот на свештеникот Арон.“

³⁴И ги преброија Мојсеј и Арон и началниците народни Каатовите синови според родовите нивни и според семејствата нивни,

³⁵од триесет години нагоре до педесет години, сите способни за служба, за да работат во скинијата на собранието.

³⁶И излегоа на број според родовите нивни, две илјади седумстотини и педесет.

³⁷Тоа се преброените од родовите Каатови, сите што ќе служат при скинијата на собранието, и што ги изброија Мојсеј и Арон по заповед Господова, дадена преку Мојсеј.

³⁸И Гирсоновите синови беа преброени според родовите нивни, и според семејствата нивни,

³⁹од триесет години и нагоре до педесет години, сите способни за служба, за да работат во скинијата на собранието;

⁴⁰и излегоа на број, според родовите нивни, според семејствата нивни, две илјади шестотини и триесет.

⁴¹Тоа се изброените од родовите на Гирсоновите синови, сите што ќе служат во скинијата на собранието, а кои ги изброија Мојсеј и Арон, по заповедта Господова, дадена преку Мојсеј.

⁴²Родовите на Мерариевите синови беа изброени според родовите нивни, според семејствата нивни,

⁴³од триесет години и нагоре, до педесет години, сите способни за служба, да работат при скинијата на собранието;

⁴⁴и излегоа на број, според родовите нивни, три илјади и двесте.

⁴⁵Тоа се преброените од родовите на Мерариевите синови што ги преброија Мојсеј и Арон по заповедта Господова, дадени преку Мојсеј.

⁴⁶И беа изброени сите левити што ги изброија Мојсеј и Арон и началниците израелски според родовите нивни и според семејствата нивни,

⁴⁷од триесет години и нагоре до педесет години, сите способни да работат и да носат во скинијата на собранието,

⁴⁸и излегоа на број осум илјади петстотини и осумдесет.

⁴⁹По заповед на Господ ги распореди Мојсеј, секој на својата работа што ќе ја врши, и беа изброени, како што му заповеда Господ на Мојсеј.