Read Свето Писмо: Стандардна Библија 2006 (со девтероканонски книги) Михеј 3 Bible Online

Михеј 3 - Свето Писмо: Стандардна Библија 2006 (со девтероканонски книги) bible

Михеј 3

¹Потоа реков — чујте, поглавари Јаковови и кнезови на домот Израелов: зар вие не знаете што е право?

²А вие го мразите доброто и го сакате злото, ја дерете од нив кожата, и месото од коските нивни;

³јадете од телото на Мојот народ и ја дерете кожата нивна, а коските нивни ги кршите како за во сад, и месото нивно го дробите како за во котел.

⁴И тие ќе викаат кон Господ, но Тој нема да ги чуе и ќе го сокрие лицето Свое од нив во тоа време, поради нивните злодела.

⁵Така вели Господ против пророците, кои го воведуваат во заблуда Мојот народ, кои кога имаат храна во устата проповедаат мир, а ако никој не им стави во уста ништо, против него објавуваат војна.

⁶Затоа, место виденија, вие ќе гледате ноќ, место пророштво — темнина; и сонцето ќе зајде над тие пророци и денот ќе потемнее над нив.

⁷Ќе се засрамат јасновидците, ќе бидат посрамени гледачите, и сите ќе ја затворат устата своја, зашто нема да добијат одговор од Бога.

⁸Но јас сум исполнет со силата на Духот Господов, со правда и цврстина, за да му ги кажам на Јаков престапите и на Израел — гревот негов.

⁹Чујте ме сега, поглавари на домот Јаковов, и кнезови на домот Израелов, вие, кои се гнасите од правдата и што искривувате сѐ што е право.

¹⁰Вие, кои го градите Сион со крв и Ерусалим со неправда.

¹¹Поглаварите негови судат со поткуп, свештениците учат за да заработат, а пророците пророкуваат за пари, и сепак се повикуваат на Господ, велејќи: „Нели е Господ меѓу нас; затоа зло нема да нѐ постигне.“

¹²Затоа поради вас Сион ќе биде разорен како нива, а Ерусалим ќе стане купиште од урнатини, и планината на тој дом ќе зарасне во шума.