Read Свето Писмо: Стандардна Библија 2006 (со девтероканонски книги) Михеј 6 Bible Online

Михеј 6 - Свето Писмо: Стандардна Библија 2006 (со девтероканонски книги) bible

Михеј 6

¹Слушајте што вели Господ: „Стани и суди се пред горите, ридовите да го чујат гласот твој!“

²Чујте го, гори, судот Господов, и вие, цврсти основи на земјата, зашто Господ му суди на Својот народ, се тужи со Израел.

³„Народе Мој, што ти направив и со што ти дотегнав? Одговори Ми.

⁴Јас те изведов од египетската земја, те ослободив од куќата на ропството и ги водев пред тебе Мојсеј, Арон и Мирјам.

⁵Народе Мој, сети се што кроеше Валак, царот моавски, и што му одговори Валаам, синот Беоров и што стана од Ситим до Гилгал — за да ги познаеш праведните дела на Господ.“

⁶„Со што да застанам пред Господ, да се поклонам пред небесниот Бог? Да застанам ли пред Него со сепаленици, со едногодишни телци?

⁷Но може ли да Му се угоди на Господ со илјадници овни или неизмерни потоци масло? Дали да Му го дадам мојот првороден син за престапите свои и плодот на утробата своја — за гревовите на душата своја?“

⁸О, човеку, речено ти е што е добро, и што бара од тебе Господ; да работиш праведно, да сакаш милосрдни дела и понизно да врвиш пред твојот Бог.

⁹Гласот Господов вика кон градот, мудроста повикува на страхопочит кон Твоето име: слушајте племенски и градски Собранија!

¹⁰Па зар не се наоѓаат во домот на безбожникот богатство неправедно и мерка смалена, одвратна?

¹¹Можам ли да ги оправдам мерките на беззакониците и неточните тегови во торбата?

¹²Вашите богаташи се полни со неправда, и жителите ваши говорат лага, а и јазикот нивни измама е во устата нивна.

¹³Затоа почнав да те ударам со запустување поради гревовите твои.

¹⁴Ќе јадеш — и нема да се наситуваш, гладен ќе остануваш; ќе оставаш настрана, но нема да го зачуваш, а она што ќе зачуваш, тоа Јас ќе го предадам на меч.

¹⁵Ќе сееш, но нема да жнееш; ќе гмечиш маслинки, но нема да имаш масло, ќе цедиш гроздов сок, но нема да пиеш вино.

¹⁶Кај вас се запазиле обичаите на Омриј и сите дела на домот Ахавов, и вие постапувате според нивните совети. Затоа ќе те предадам на запустување и жителите твои на потсмев, а вие ќе претрпите срам од Мојот народ.