Read Свето Писмо: Стандардна Библија 2006 (со девтероканонски книги) Захарија 6 Bible Online

Захарија 6 - Свето Писмо: Стандардна Библија 2006 (со девтероканонски книги) bible

Захарија 6

¹Пак ги подигнав очите свои и гледам: а таму, ете, четири коли со коњи излегуваат од еден дол меѓу две планини, а тие планини беа од бакар.

²Кај првата кола коњите беа црвеникави, кај втората — црни;

³кај третата кола коњите беа бели, а кај четвртата кола — шарени со сиви дамки.

⁴Проговорив и му реков на ангелот, што зборуваше со мене: „А што значи ова, господине мој?“

⁵Ангелот одговори и ми рече: „Тоа се четирите небесни духови [1], кои излегуваат откако се претставија пред Господарот над целата земја.

⁶Црните коњи излегуваа кон северната земја, а белите одеа кон западната земја, додека шарените коњи одеа кон јужната земја.“

⁷Кога излегоа, коњите се впуштија да ја обиколат земјата; и Тој им рече: „Обиколете ја земјата“, и тие ја обиколија.

⁸Тогаш тој ме повика и ми рече: „Ете, оние што отидоа кон северната земја, го успокоија духот Мој против северната страна.“

⁹И пак дојде слово Господово до мене:

¹⁰„Собери приноси од прогонетите, од Хелдаја, од Товија и од Једаја, и тргни истиот ден, па дојди во домот на Јошија, синот Софониев, каде што тие пристигнаа од Вавилон.

¹¹Земи од нив сребро и злато, па направи круни, и стави ги на главата на Исус, синот Јоседеков, великиот свештеник

¹²и речи им: вака вели Господ Саваот: ‚Ете, човек, чие име е Зачетник,‘ Тој ќе израсне од коренот свој и ќе создаде храм Господов.

¹³Тој ќе создаде храм Господов и ќе се прослави, ќе седне на престолот свој и ќе биде владетел. А од Него, на престолот ќе биде и свештеник и ќе има согласност за мир меѓу едниот и другиот.

¹⁴А круната нека остане кај Хелдаја и Товија, за Једаја и Јошија, синот Софониев, како спомен во храмот Господов.

¹⁵И оддалеку ќе дојдат луѓе, кои ќе учествуваат во градењето на храмот. Ќе разберете дека Господ Саваот ме испрати кај вас, и сето тоа ќе се изврши, ако искрено го послушате гласот на вашиот Господ Бог.“