Read Свето Писмо: Стандардна Библија 2006 (со девтероканонски книги) Захарија 8 Bible Online

Захарија 8 - Свето Писмо: Стандардна Библија 2006 (со девтероканонски книги) bible

Захарија 8

¹И пак дојде слово од Господ Саваот:

²вака вели Господ Саваот: „Љубоморен сум за Ерусалим и за Сион со голема ревност и со голем гнев горам за него.“

³Така вели Господ: „Ќе се вратам во Сион и ќе живеам во Ерусалим, и Ерусалим ќе се вика град на верноста, и гората на Господ Саваот ќе се вика — Света Гора.“

⁴Така вели Господ Саваот — „И пак старци и старици ќе седат по улиците на Ерусалим, секој со стапчето свое поради големата старост своја.

⁵А и улиците на тој град ќе се исполнат со момчиња и девојки, кои ќе си играат по улиците негови.“

⁶Вака вели Господ Саваот: „Ако во очите на другите им биде чудно во тие дни, зар ќе биде тоа чудно и во очите Мои?“ — вели Господ Саваот.

⁷Вака вели Господ Саваот: „Ете, Јас ќе го спасам Својот народ од источната земја и од западната;

⁸ќе ги доведам, и тие ќе живеат во Ерусалим и ќе бидат Мој народ, и Јас ќе им бидам нивни Бог, во верност и во правда.“

⁹Така вели Господ Саваот: „Поткрепете ги сега рацете свои вие, што ги слушавте овие зборови од устата на пророците, кои беа при основањето на домот за Господ Саваот, за да се изгради храмот.

¹⁰Зашто пред оние дни немаше ни плата за човек ниту награда за трудот на животното; немаше спокојство од непријателите ни за оној што доаѓаше, ниту за оној што си одеше; и дозволував Јас секој човек да му е непријател на друг човек.

¹¹А сега за остатокот од овој народ Јас нема да сум таков како во поранешните денови“ — вели Господ Саваот.

¹²Зашто сеидбата ќе се врши во мир, лозата ќе го даде својот плод, земјата ќе го даде својот род, а и небесата ќе ја даваат својата роса; и сето тоа ќе го предадам на остатокот од овој народ.

¹³И како што вие, доме Јудин и доме Израелов, бевте проколнати меѓу народите, така ќе ве избавам, и вие ќе бидете благословени; не плашете се, рацете ваши нека се поткрепат!

¹⁴Зашто така вели Господ Саваот: „Како што бев определил да ве казнам, кога татковците ваши Ме разгневија — вели Господ Саваот — и не зажалив,

¹⁵така пак определив во овие дни на Ерусалим да му направам добро и на домот Јудин; не плашете се!

¹⁶Еве ги наредбите што треба вие да ги извршувате: зборувајте вистина еден на друг; праведно и мирољубово судете пред градските порти.

¹⁷Никој од вас да не му мисли зло на ближниот свој, и не посакувајте лажна клетва, зашто сето тоа Јас го мразам“ — говори Господ.

¹⁸И дојде слово до мене од Господ Саваот:

¹⁹Вака вели Господ Саваот: „Постот во четвртиот месец, постот во петтиот, постот во седмиот и постот во десеттиот месец за домот Јудин ќе бидат радост и голема веселба, само сакајте ги вистината и мирот.“

²⁰Така вели Господ Саваот: „Уште ќе доаѓаат народи и жители од многу градови,

²¹и ќе дојдат жителите од еден град кај жителите во друг град, — па ќе речат: да дојдеме да се помолиме пред лицето на Господ и да Го побараме Господ Саваот; тогаш секој ќе рече — ќе појдам и јас.

²²И ќе доаѓаат многу племиња и народи силни, за да Го бараат Господ Саваот во Ерусалим и да се помолат пред лицето на Господ.“

²³Така вели Господ Саваот: „Во тие дни ќе се фаќаат по десет души од разни народи за полата од Јудеец и ќе речат — ќе појдеме со тебе, зашто чувме дека Бог е со вас.“