Read Свето Писмо: Стандардна Библија 2006 (со девтероканонски книги) Захарија 9 Bible Online

Захарија 9 - Свето Писмо: Стандардна Библија 2006 (со девтероканонски книги) bible

Захарија 9

¹Пророчкото слово на Господ е против земјата Хадрах, и во Дамаск ќе се задржи, зашто окото Господово ги набљудува сите луѓе, како и сите колена израелски;

²тоа е и врз Хамат, кој се граничи со него, и врз Тир и Сидон, иако се многу мудри.

³Тир изградил тврдина, натрупал сребро како прашина, и злато како улична кал.

⁴Но, ете, Господ ќе го направи беден и ќе му ја струполи силата негова во морето, а и самиот ќе биде истребен со оган.

⁵Тоа ќе го види Ашкелон, и ќе се уплаши, а и Газа — па и таа ќе затрепери многу, и Екрон, зашто го изневери надежта негова: нема да има цар во Газа, и Ашкелон ќе запусти.

⁶Туѓо племе ќе живее во Ашдод, и Јас ќе ја уништам гордоста на Филистејците.

⁷Ќе ја извлечам крвта од устата нивна, нечистотијата од забите нивни и тие ќе паднат пред нашиот Бог и ќе бидат како семеен клан во Јудеја, а Екрон ќе биде како Јевусиј.

⁸Ќе поставам стража околу Мојот дом спроти војската, спроти оние, кои преминуваат натаму и наваму, и нема повеќе да доаѓа непријател; зашто сега видов со очите Свои.

⁹Ликувај од радост, ќерко Сионова, извикувај, ќерко ерусалимска; ете, Царот твој се враќа кај тебе, праведен е и со победоносна сила, кроток, седнат на магаре, рожба на магарица.

¹⁰Тогаш ќе ги истребам колите на Ефрем и коњите на Ерусалим, и ќе се скрши бојниот лак; и Тој ќе објави мир на народите, и царството Негово ќе се протега од море до море и од Еуфрат до краиштата на земјата.

¹¹А што се однесува до тебе, Израеле, заради крвта на заветот Јас ги ослободив затворените од безводните јами.

¹²Враќајте се во тврдината вие затвореници, полни со надеж! Денес навестувам дека ќе ти дадам двојно.

¹³Зашто како лак ќе го затегнам Јуда и лакот ќе го вооружам со Ефрем, па ќе ги подигнам синовите твои, Сионе, против синовите твои, Јаване, и тебе ќе те направам како меч јуначки.

¹⁴Ќе се појави над нив Господ и како молскавица ќе излета стрелата Негова; ќе загрми Господ Бог со трубата и ќе дојде на јужните бури.

¹⁵Господ Саваот ќе ги брани, и тие ќе ги газат дури и камењата за праќи; ќе пијат крв место вино; и ќе се наполнат како жртвени чаши, како аглите на жртвеникот.

¹⁶И ќе ги спаси нивниот Господ Бог во оној ден, како стадо од Својот народ; зашто тие ќе заблескаат како камења на круна во земјата Негова.

¹⁷О, колку голема ќе биде добротата негова и каква ќе биде убавината негова! Житото ќе ги расцути момците, а благото вино — девојките.