Read Свето Писмо: Стандардна Библија 2006 (со девтероканонски книги) Лука 19 Bible Online

Лука 19 - Свето Писмо: Стандардна Библија 2006 (со девтероканонски книги) bible

Лука 19

¹Потоа влезе Исус во Ерихон и минуваше низ него.

²И ете, еден човек по име Закхеј, кој беше началник на цариниците, и беше богат,

³настојуваше да види Кој е Тој Исус, но не можеше од народот, зашто беше низок по раст.

⁴Затоа потрча напред и се качи на една смоква за да Го види, бидејќи покрај неа требаше да помине.

⁵Исус, пак, кога дојде на тоа место, погледна нагоре, го виде и му рече: „Закхеј, слези побргу, зашто денес треба да бидам во твојот дом.“

⁶И тој веднаш слезе и Го прими со радост.

⁷И сите, кога го видоа тоа, негодуваа и рекоа: „Отиде во куќа на грешен човек.“

⁸А Закхеј застана и Му рече на Господ: „Господи, еве половината од својот имот ќе ја дадам на сиромаси; и ако сум зел од некого нешто, четворно ќе го вратам.“

⁹А Исус му рече: „Денес дојде спасението за овој дом, зашто и тој е син Авраамов.

¹⁰Зашто Синот Човечки дојде да го побара и да го спаси она што е загубено.“

¹¹А на оние што го слушаа ова, им кажа и една парабола, бидејќи беше близу до Ерусалим и тие мислеа дека набргу ќе се појави царството Божјо,

¹²па рече: „Еден благородник заминуваше во далечна земја да прими царска власт за себе и потоа да се врати.

¹³Тогаш ги повика своите десет слуги, им даде десет мини и им рече: ‚Тргувајте со нив, додека да се вратам!‘

¹⁴Но граѓаните го мразеа и испратија по него пратеници, велејќи: ‚Нејќеме тој да царува над нас.‘

¹⁵А кога се врати, по примањето на царската власт, нареди да ги повикаат оние слуги, на кои им ги беше дал парите, за да види, кој колку спечалил.

¹⁶Дојде првиот и му рече: ‚Господаре, твојата мина заработи десет мини.‘

¹⁷И му рече: ‚Добро, верен слуго; во мала работа беше верен, еве ти власт над десет градови.‘

¹⁸Дојде вториот и рече: ‚Господаре, твојата мина заработи пет мини.‘

¹⁹А тој и нему му рече: ‚И ти биди — над пет градови.‘

²⁰И друг дојде, велејќи: ‚Господаре, еве ти ја твојата мина, што ја чував в крпа,

²¹зашто се плашев од тебе, бидејќи си строг човек: земаш од каде што не си оставил и жнееш, каде што не си сеел.‘

²²А господарот му рече: ‚Со твојата уста ќе ти судам, лукав слуго; ти знаеш дека сум жесток човек: земам од каде што не сум оставил и жнеам, каде што не сум сеел;

²³тогаш, зошто не ги даде моите пари кај трговците, та кога ќе се вратам, да си го соберам сосе добивка?‘

²⁴Па им рече на присутните: ‚Земете ја од него мината и дајте му ја на оној, што има десет мини!‘

²⁵И му рекоа: ‚Господаре, тој има десет мини!‘

²⁶Ви велам дека секому што има ќе му се придаде; а од оној што нема, ќе му се одземе и она што го има.

²⁷А оние мои непријатели, што не сакаат да царувам над нив, доведете ги тука и погубете ги пред мене!“

²⁸Кога го рече тоа, Тој тргна понатаму, искачувајќи се кон Ерусалим.

²⁹И кога се приближи до Витфагија и Витанија, до таканаречената Маслинова Гора, испрати два ученика,

³⁰велејќи: „Одете во селоно отспротива. Штом ќе влезете во него, ќе најдете едно врзано магаре, кое ниеден човек не го јавал. Одврзете го и доведете го!

³¹И ако ве праша некој: ‚Зошто го одврзувате?‘ Кажете му вака: ‚Тоа Му е потребно на Господ.‘“

³²Кога отидоа испратените, најдоа како што им беше рекол.

³³И кога го одврзуваа магарето, стопаните им рекоа: „Зошто го одврзувате магарето?“

³⁴Тие одговорија: „Потребно Му е на Господ.“

³⁵И го доведоа кај Исус, па штом ги нафрлија облеките свои на магарето, Му помогнаа на Исус да се качи.

³⁶И додека минуваше Тој, ги постилаа своите наметки по патот.

³⁷А кога наближи до местото од каде што се слегува од Маслиновата Гора [12], сето мноштво ученици почна радосно да Го прославува Бога со висок глас, за сите чуда што ги видоа,

³⁸велејќи: „Благословен е Царот Кој доаѓа во името Господово! Мир на небото и слава во висините!“

³⁹А некои фарисеи од народот Му рекоа: „Учителе, забрани им на учениците Твои!“

⁴⁰Но Тој им одговори и рече: „Ви велам, ако тие замолкнат, камењата ќе повикаат.“

⁴¹А кога се приближи и го виде градот, заплака над него

⁴²и рече: „Кога би можел во овој ден и ти да го дознаеш она што е потребно за твојот мир! Но тоа е сега сокриено од твоите очи.

⁴³Зашто ќе дојдат денови за тебе и непријателите твои ќе те опкружат со ровови и ќе те опколат, и ќе те притеснат од сите страни;

⁴⁴и ќе те срамнат со земјата тебе и ќе ги избијат децата твои во тебе и нема да остават камен на камен од тебе, зашто не си го позна времето кога беше посетен.“

⁴⁵И кога влезе во храмот, почна да ги гони оние што продаваа и купуваа во него,

⁴⁶велејќи: „Напишано е: ‚Домот Мој е дом за молитва, а вие го направивте разбојничка пештера.‘“

⁴⁷И поучуваше секој ден во храмот. А првосвештениците и книжниците, и старешините народни, настојуваа да го погубат,

⁴⁸но не пронајдоа како да Му го направат тоа, зашто сиот народ Го слушаше со големо внимание.